Лух Авт
Хухатӆыман юрэӆ па щёмеӆ артаӆасэӆ
Хащам ӆапатан Харпан «Северный характер. Трейл» нэмпи касапса верыӆыса. Хуӆамсот хоят, хольмаң пеӆа хут команда эӆты этӆысат.
Мет юраңшак па щёмаңшак хоятат «Профи» нэмпи категория хуват кассат, ӆув 12 км Жёлтая рэп унты хухаӆсат. Ӆув кутэӆан Анна Владимировна Яптик ищи хухӆас, «Няръяна Ңэрм» ур ясңаң газетайн рупитаӆ. «Касапсайт щиран рупитты хоятат кутан ӆаварт ус кеват хуват хухаӆты, па щи тумпийн мосас ёханые шоппи вуншты. Йи тахайн юшем уштасэм па ёхӆы керӆасам. Щи онтасан щёс щиран еша ёхи хащсам. Ма век ант нумассам, муң командаев оӆңа питаӆ. Щишан хоты верытсам, щиты щи еӆӆы хухаӆсам. Таӆаң тэӆан там катхощъяң километра ма йи щёс па хуӆам минута сахат мантсэм. Хухӆам хоятат щёс щиран артаӆасайт па охан мойӆаптасайт. Ма нийӆхус щёрас ёша пайтсам. Щит манэма шеңк ун нётоп! Щишан, айӆат мохиӆува тамащ касапсаята мосаӆ кашң пуш пиӆтащиты, хухатӆыты, юрӆаӆ артаӆыты», — Анна ястас.
Хой ӆув щираӆан тухаӆ ишан хухатӆыйӆ, щитат 6 км хухаӆсат. Кал вуншман постам тахаеӆ унты ёхтаптысат. Кимет хатаӆан, хой ӆаңхас — атэӆ хухӆас. Щита ищи кашң хоят мойӆаптаса. Ветъяң моӆтаса ювам нэңат па ёхат шушты сувңан пиӆан шушсат. Ӆаңхам хоятат ГТО норма щиран масат.
Там касапсайн оӆаң тахая Ямальской район хоятат питсат, кимет — Ӆапатнаңк, хуӆмет — Пулңават. Хут километра хухӆам хоятат кутан оӆңа Тарко-Сале питсат, кимет — Тазовский, хуӆмет — Пулңават. Щёхар тыӆащ кутопкеман «Северный характер» хоща пиӆтащам хоятат ветмет пуш Пулңават вошан хухаӆты питӆат.
Аллина Тоярова ханшам потар
Авторы
Лух Авт
Темы