Лух Авт
Хут няврэм па нийӆхус хиӆы тайты нэ
Хасям ӆапатан этты газетайн Игорь Егорович па Зинаида Васильевна Шияновңан эӆты ханшсам. Игорь Егорович сэма питам, энмам муваӆ эӆты нумаӆмийс. Там лопасан ийимеӆ — Зинаида Васильевна Шиянова (Кельчина) эӆты потрэм еӆӆы туӆэм.
Там сютсяты хатӆатан хон мувеван Аңки емаң хатӆ питаӆ, потрэм си емаң хатӆа постасэм. Си хатаӆан кашң аңки сама хойты мет ям ясаңан ястаӆэв, апаӆмиӆэв па мойӆапсайн мойӆаӆэв.
Ай пора таӆӆаӆ
Зинаида Васильевна Игорь Васильевич пиӆан ӆув няврэмӆаӆ тумпийн ортэӆ кат пох энмаӆсаңан, ин па кат эвие-опеңңан вусңан. Зинаида Васильевна хоты ай порайн энмас, айшукие ястас: «Ма Ӆорвошан катра леккар хотан сэма питсам. Аңкем-асем Вантыйн хуӆ веӆпасӆыман усңан. Семьяеван муң вет няврэм усув. Асем Василий Павлович Кельчин си порайн партийн ус, хоӆта парӆа, тохи манаӆ. Хуӆ веӆты юпийн тащ хота китыӆыса. Сита товийн муша питаӆ, леккар хота туӆа. Си юпийн куртан хасьсат. Асем антома ювам юпийн, аңкем уртыӆаман Питлора туӆаюв. Аңкем шуңат — Роза Алексеевна Кельчина (Хартаганова) Питлор нэ ус. Ма си порайн няӆ таӆ ӆоват эвие.
Асем парам юпийн аңкем Лазарь Семёнович Еприн хося оӆаң имеӆан вуртыса. Яң таӆ тащ хотан яңхсув. Оӆаң имеӆ пиӆан ӆапат таӆ усув. Ма нумасӆам, сит аңкеӆ. Хун ветмет классан утаӆтысам, оша питас — сит ийӆаңем оӆаң имеӆ ус. Ма Пухар имем лум ӆыпийн иса оӆӆысам. Тащ хотан няврэм антом. Уншак няврэмат ашкуӆая туӆайт. Тыеӆ-тохеӆ нёхамтыӆам, торастыӆам таңха. Аңкем шуңат кум ант шитаӆ, юх сэварты, ӆэтот каварты, иса нётты, йиңкен-муен, иса мосаӆ.
Пухар имеман ернас понэм эӆты катӆапӆайм, норыя опсаӆӆайм, йинтапан катӆаптаӆайм, пуншукан маӆӆы, ёнтасты утаӆтаӆӆы. Манэм щашкан эӆты аканян ёнтӆаӆӆы, сэван верӆаӆӆы. Аңкема ант торастаты ураңан сот сир от верты партыӆысӆы. Варас эӆты ухаӆ верты утаӆтасӆы. Иса тэӆыя ухаӆ верӆам, каратӆаӆӆам. Таӆаң хатӆ верты верытсам. Ӆон верты омпсаӆаӆӆы манэм. Ӆувеӆа нийӆъяң таӆ моӆтас ус. Шушиӆыӆман, нёта акатты яңхӆаман. Ашкуӆая нийӆ таӆан масайм, инымеман ант эсаӆсайм».
Еӆӆы манты уӆапсайӆ
Зинаида Васильевна яң класс етшамаӆ юпийн, Пулңават воша педучилищая утаӆтыты манас. Еӆӆы манты уӆапсайӆ эӆты па айшукие ястас: «Педучилищайн вет хатӆ туп утаӆтысам. Пиӆнэңеман ёхи манты хусьсайм. Си пора эӆты Ӆорвошан уӆӆам. Ху сая тусайм. Хуӆ веӆман уӆӆаман. Кат няврэм — эви па пох энмаӆсаман, Екатерина па Станислав. Уна йисңан, ӆув семьяйт тайӆаңан. Эвем хуӆам няврэм, похем па хуӆам няврэм тайӆ.
Няврэмӆам пиӆан Игорь Егорович хиӆэӆңан — Руслан па Дамир, шукасьман хасьсаңан, ӆынан па энмаӆсаман. Ӆув па семьяяңат. Руслан хуӆам няврэм тайӆ. Дамир — нийӆ няврэм: няӆ ӆув няврэмаӆ па няӆ — вуйм отат.
Мин ин па кат эвие вусман, хут па нийӆ таӆ ӆоватңан. Вертты кеман энмаӆӆаӆман, хоята йиӆңан. Вуйм няврэм, вераӆ ёвра ки манаӆ, ищи па ястаӆэн, иса хун восьхиман тайӆэн. Таканшак тайты мосаӆ, муй рахаӆ, муй ант рахаӆ верты, ат уятӆат, Ӆуң хуват ноптаӆман яха яңхӆув, ант поньхемиӆңан. Муй хуӆ уӆ, уятӆаңан. Муй, иса муң пиӆэван».
Зинаида Васильевна па Игорь Васильевич ияха хут няврэм тайӆатан, нийӆхус хиӆы. Еӆӆы пеӆа тумтака уӆаты, няврэмӆанан па хиӆыӆаӆан шавиман ат тайӆайты. Тумтак ёш па тумтак кур!
Альбина Тырлина ханшам потар
Авторы
Лух Авт
Темы