Лух Авт
Хутъяӊ пеӆа вет сёрс хоят вуӆы ёх емаӊ хатӆа ёхтыӆыйс
Хасям сютсяты хатӆатан Пулӊават вошан вуӆы ёх емаӊ хатӆ манас. Шоши мир ёх уӆапса вантты хон мувев па па муват эӆты хутъяӊ пеӆа вет сёрс мойӊ хоят ёхтыӆыйс.
Кат хатӆ сыс ар хорпи касты, тынасты, ӆэтот ӆэсятты па умасьӆыты харат ӆарпитман усат, каш манты тахайт рупитсат. Кинайт вантты, пормасат шавиты, шоши мир ёх ай няврэмат пиӆан рупитты, вератты, инсясапсайт ӆэрапты па аӆ шай йинсематы вуӆы хотат рупитсат.
Овс мув касапсаятан округ вошат па куртат эӆты касты ёх касас. Няврэмат, ёх хоятат па нэӊат хорам сохӆаӆ этаӆтысат. Си тумпийн хон мув кусяйт округ губернаторэв пиӆан еӊта пасан суран уйтантысат, шоши мир ёх уӆапса эӆты потар тусат.
Шоши мир ёх нётапсайт ӆэрапсайт
Емаӊ хатӆат манты порайн, Ямал яӆап йис уӆапса хотан Хон мув Президент Администрация оӆаӊ ӆаӊкар ху Сергей Кириенко, округ куся ху Дмитрий Артюхов, УРФО полномочной представитель Артём Жога, рут мир верат туты куся ху Игорь Баринов ияха еӊта пасан суран актащисат.
Си уйтантопсайн кат ханты энамты хоятӊан усӊан: Васьёханован ханты ясӊа няврэмат утаӆтаты ху Алексей Конев па Тюменской индустриальной университетан аспиранта утаӆтыты пох Антон Русмиленко. Хоӆна СВО харан уӆам хоятӊан Кристина па Родион Пуйко, общественной рупатайт туты нэ Галина Матарас, Рут мир вуӆы ёх Союз куся ху Михаил Яр, вуӆы тащан яӊхты пох Енкся Пяк па ар няврэм энмаӆты хоятӊан Мария па Денис Тайшинӊан си тахая вохиӆысайт.
Муй хорпи вуӆы тащан яӊхты хоятата нётапсайт мосӆат, ашкуӆайн утаӆтыты няврэмат манты па еӆӆы туты верат ӆэрапсайт. СВО хося уӆты хоятӆув па Воӆаӊ Ляля нётам шоши мир ёх, муй хорпи нётапсайн нётты мосаӆ.
«Хон мув кусяйн Овс мув, Сибирь па Дальний Восток шимӆаӊ мир ёх ураӊан еӆӆы манты верат концепция туӊмаӆса. Ун кер тыӆасян этаӆ. Еӆӆы туты верат антом туп кусяятан ат ӆэсятсайт. Общинайт па шоши мир ёх пиӆан рупитты хоятат пиӆан рупатаеӆ яха ат тусэӆ», — ФАДН куся ху Игорь Баринов ястас.
Мет юраӊ па апраӊ хоятат кащтасайт
Кат хатӆ сыс шоши мир хоятӆув Овс мув касапсаятан кассат. Туп вуӆы ухаӆ шоппи навартман, юх таӆман па вуӆэӊ ухаӆан навраӆтыман, 140 хоят юрӆаӆ альсат. Кимет хатаӆан ёх хоятат тынсяӊ сува ёваӆмисат, хуӆам пуш навармисат, катӆантыман юрасьсат, ӆохан хатэмисат па этнобиатлон хося кассат.
Вуӆэӊ ухаӆан навраӆтыман — мет апраӊ па умась касапса. Там пуш си касапсайн 59 ёх хоят па 27 нэ юращас. Оӆаӊ тахая Михаил Лаптандер этас, 2 минута 20 моӆтас секунда хуват ёхтамтас. Приуральской района яӆап ӆонсьхопан манас.
– Ямальской район эӆты Виталий Вануйто мет апраӊа, 404 пуш ухаӆ шоппи навартман, оӆаӊ тахая этас.
– Хуӆам пуш навармиман, Пуровской район Самбург вош эӆты Анатолий Вора оӆаӊ тахая этас, 9,78 метра навармас.
– Катӆантыман юрасьты ёх хоятат кутан, хольмаӊ пеӆа хут таӆ ӆоват Яков Яптик Сеяха курт эӆты, мет юраӊ ус.
Мет ӆавӆасам касапсайт
Кат хатӆ тынасты па ӆэтот этаӆтыты харат рупитсат. Кашӊ хоят си хатаӆӊанан моӆты эпӆаӊ ӆэтот ӆавемас, Овс мув ӆэтот умасьӆыйс. Си тумпийн, хошъйиӊк каварты па хуӆ нёхарты касапсайӊан мантсаӊан.
Нярхуӆ верты тахайн ӆапат хоттэӆ касас. Оӆӊа Мужи вош эӆты Николай па Алёна Коневӊан этсаӊан, хольмаӊ пеӆа вет сёрс соӆкувайӊ сертификат шитсаӊан.
Хошъйиӊк каварты харан вет команда рупитас. Си тахая ёхтыӆыйм ёх умасьӆыман мет эпӆаӊ хошъйиӊк пирысат. Сита «Русь дружина» оӆаӊ места ус, мет ар пос шитас.
Хорам сохат этаӆтысайт па хора вуйӆысайт
Кашӊ пуш вуӆы ёх емаӊ хатӆатан мойӊ хоятат шоши мир хоятӆув тайты сохат, вуӆэӊ ухӆат вантсат. Ёхтыӆыйм хоятат хорам сохата ӆуматтам шоши мир няврэмат, сахаӊ нэӊат па молсяӊаӊ ёх хоятат пиӆан хор версат, вуӆэӊ ухаӆан па ӆонсьхопан хатэмисат. Си касапсайӊан хося нох питам ур, ханты па саран ёх хоятат па мойӆаптасайт.
Там манам емаӊ хатӆатан Москва вош эӆты ёхтыӆыйм ху Тимофей Колесников рупитас. Шоши мир хоятӆув хора вуйӆысӆы. Си еӆпийн, ӆув Пулӊават вошан «Полярный круг» газетайн рупитас. Си хара ёхтыӆыйм кашӊ тась хотан яӊхты нэ, няврэм, хоттэӆат, хоӆ хоран китӆайт.
Вуӆы хота ӆоӊематы рахас
Уйтантопсайн кашӊ хоят вуӆы хота ӆоӊемиты верытас. Энамты ёх, шоши мир ёх садик, кино этаӆтаты, пормас шавиты, инсясапсайт ӆэрапты, вератты, «Ямал-Медиа» вуӆы хотат рупитсат. ӆув кутэӆан там пора тайты сохат нэмпи вуӆы хот хоӆна ус. Кашӊ энамты ёх, няврэм па ун хоят сита ӆувеӆа «ЯМолод» бренд сохат вантас па ӆутас.
Си тахайн ай няврэмат ӆув тайты утситы сохат ӆэсятсат. Аӊкиӆаӆ па си пуляӊ кофе йинсемисат па хотхара понты щашкан ёнтты мастер-классан пиӆтасисат.
Там емаӊ хатӆа ёхтыӆыйм округ, па па мир хон мув хоятат папуш манты уйтантопса унты аматман ёхи мантсат. Вуӆы тащан яӊхты хоятата яӆпа манты емаӊ хатӆ унты пайм уӆа ястаӆув. Яӆпа ёхатты таӆан нынан ӆаваӆӆаӆӆув. Касты харата аршак ханты хоят ат ёхтыӆыйӆ па касапсаятан нох питыӆыйӆ. Хорамаӊа ёнтам сохӆаӆ мира ат этаӆтыӆат. Тумтака уӆаты, тащӆан шавияты.
Альбина Тырлина ханшам потар
Авторы
Лух Авт
Темы