Лух Авт
Хыщам таӆ сыс ар хаттэӆ нятса
Хыщам таӆ сыс 5 200 касӆыман яӊхты хаттэӆ нятапсына масайт. Аратэӆна 3 300 молтас ол, ветъёӊкем нюки, ветсаткем кор па керосиновой лампа, ветсат молтас метра пон па кат щёрс ниӆсат партонна понам ӆаращ.
Мет артан щимащ нятапсына мийм хаттэӆ Приуральской, Тазовской па Ямальской район эваӆт оллат. Ӆорвош районна туняӆ 340 хаттэӆ нятса. Каӆаӊаӊ нэӊхэт па хуӆ веӆты ях мет масты пормасатна масайт: нюкет па парщин, корат па хат лаӊал ӆаӊты кортэтна, тут маты пормасатна, понатна, партонаӊ ӆаращатна, ной, сахлат, корӆуӊкат па па пормасат. Щи томпына, ниӆхощъёӊ хаттэӆ эӆты, хой тут маты генератор ӆув охална лотас, па хутхощъёӊ хаттэӆ — бензопила лотас, пасатам охлаӆ парта сохаптасайт.
«Яӆап таӆ тыӆащ 1-мет хатӆ 2026-мет таӆ эваӆт нятапсы перечень вуӆамса — касӊ хаттэӆ кат спасательной жилетан мата питӆа. Щи томпына нятапсэт эӆатсайт: тут йиӊк ораӊна катхощъёӊ щёрс па генератор ораӊна хольмаӊ щёрс маса. Тампус мули холам хаттэӆ йиӆап мера хуват хольмаӊ щёрс аратна ясна пайтсат», — Ӆорвош район Овс мув шоши мир па сельской хозяйство пиӆна ропытты воӆаӊ специалист Иван Сандрин лавас.
Мет алаӊ хаттэӆ Ӆорвош район эваӆт, хой щимащ нятапсына маса — Вячеслав па Юлия Лонгортовӊан ниӆмет Мужевской тащ эваӆт. Ниӆ йик энмаӆӆаӊан, ропытты таӆӆан па яха ки понман, аратэӆна 32 таӆӆы хайӆат.
«Таӆан муӊ Мужи эваӆт сат километра хуватна касӆыӆу, ӆуӊан мет па хув. Щитна таӆ сыс, ты, муӊ холам пус топ ёхтыӆыта веритӆу. Щиты похална ёхтыӆытэв порайна, ӆытыт лотты томпына, иволап нятапсы пормасат вуӆу. Муӊ хаттэӆу ораӊна щит сэӊк ям нятап», — Вячеслав Лонгортов лавас.
Ямал мувна касӆыман яӊхты хаттэӆат эӆты маты нятапсы 2017-мет таӆ эваӆт ропытаӆ. Тампус щи перечень 25 пормас маса энмас.
Вера Лонгортова хансам потар
Авторы
Лух Авт
Темы