Лух Авт
Иуӆтыя нэмоӆты шук ант вощкаты ураӊан
Хащам ятан Совет Федерация хоща актащияман потар манас, хоты сахат мосаӆ вуӆы нёхи, мура, оӊтат иса ишукӆыя таӆаӊ тэӆан тыныты щира ӆэщатты.
Ванты хащам ятан, Россия па хон муват эӆты ёхӆышак питас. Хонна хольмаӊмет таӆ сайн там мосты верат иса нуман па нумман тайсат, хорты вуӆы эӆты нэмоӆты ант хащиӆыйс.
Там вер еӆӆы хатаӆтаты ураӊан кашӊ пуш тащан яӊхты хоятат ураӊан нётопсайт верӆайт. Муӊ округев ӆоватан нётопсайт 1,5 млрд соӆкувая хойӆат. Хон мув ӆоватан 3,5 млрд соӆкува эсаӆӆа. Ӆув эӆтэӆ 0,5 млрд — Минсельхоз.
Вуӆэт тумтака уӆтэӆ ураӊан нэман нэ вуӆэт пирыӆыӆайт, аратаӆ тащат портунан понӆайт, хорсащты порайн ищи нётопсайт маӆайт. Щи тумпийн хорам нёхи йи таха эӆты кимет тахая туты ураӊан манты юш таӆаӊ тэӆан сохаптаӆа.
Тампуш хольмаӊ пеӆа ӆапат предприятий охан нётса. Щи охӆаӆан ӆув аршак нэ вуӆы ӆутсат, войт хоӆ ӆуӊатсайт, посан понтсайт, нёта тумпийн аӆ верам ӆантат вуӆы ӆапатты ураӊан вуйман усат. Ванты, тови порайн, еӊкаӊ па ертаӊ хатӆатан нётайӊ щахрат хоӆ еӊка ювиӆыӆат.
Вуӆы тащат онтасан антом туп экономикаев нох аӆамӆэв, щи тумпийн Овс мув шимӆаӊ мир хоятат уӆапсаеӆ еӆӆы туӆэӆ, шавиӆэӆ. Ям ох сохаптатыйн энамты няврэмат вутан уӆты кашащӆат. Тащӆаӆ шавиман па няврэмӆаӆ энмаӆман касӆыман яӊхты.
Аллина Тоярова ханшам потар
Авторы
Лух Авт
Темы