Лух Авт
Яӆап хота касӆам ёх
Хащам тыӆащан Ӆоркуртан кат яӆап хот мийман уса. Йи хотан кат семья уӆты ӆоватӊан. Йи па кат паты хотаӊ. Ӆоркурт куща Сергей Петров ясаӊ щиран, катсот метра аратаӆан, кашӊ хот пуӊаӆан ям ӆоват ов хар уӆ.
Тыӆащ хащман, хоты яӆап хотан уӆмитӆа, щит эӆты каматса ясаӊ Евгений Андреевич Тояров ястас: «Ма шеӊк хув ӆавӆассам, хун яӆап хотан уӆты питӆам. Там еӆпийн хотат омпсыӆысайт, ма па век ант мийӆысайм. Катра хотэман щиты щи усам. Ёхи хащаман, паты хотэман хотӆоӊӆаӆ иса иӆ аркапты вутщас. Щишан ӆавантыты хот ятэман оӆӆысам. Ин па муй ясаӊ? Уӆты хотэм ӆащкам, нови. Атэӆ хот ят тайӆ па ёӆан лёхитыты рахаӆ, щи кеша йиӊк хошмаӆты хошап тахарман уӆӆа. Йиӊк тэкнаптыты пущка ищи щита омасаӆ. Ёӆан кищематы шуп ищи омасса. Туп муӊ утаӆсув па, щишан ким яӊхиӆыӆув. Щи веран шакхот каман ищи омасман уӆ. Пормас поныӆыты сохаӆ хот верса па ям, ант таиӆыты сохат рахаӆ щий туты. Манэма ин там яӆап хотэман уӆты каш. Щахашак, мосты пормасат айӆтыена па ӆутӆам. Иса ям».
Римма Гавриловна Сотруева кат паты хотаӊ хотан маса. «Ма похем пиӆан уӆӆам, щишан уншак хотан масайм. Ин кур аӆӆыты вер иса ёрэматы мосаӆ. Юх халытты па ёхи аӆты ант мосаӆ. Ов харэман папуш моӆты ӆэвпасат па лыптат омасӆам. Там яӆап хот ма ищи шеӊк хув ӆаваӆсэм. Ай порайн аӊкиӆы-ащиӆы хащмеман опем шуӊат хоща усам. Ашкуӆа па ун тахайн утаӆтымем юпийн ищи нэмоӆтыйн ант мийӆысайм. Ин кушкепа ма ёра хот тайӆам. Пенсияя питмем юпийн амтатӆыӆам», — Римма Сотруева ястас.
Куртатан аршак хот ки омасса — уӆапса па ямашака йис. Ванты аратаӆ куртаӊ хоятат ант верытӆат ӆув юрэӆан па щёмеӆан хот омасты. Ӆыпащ хот ки ус, кашӊ энамты няврэм па яӆпа тыйм семья верытас сельской ипотека щиран яӆап хот ӆутты. Щи порайн куртаӊ уӆапса ант хурӆаӆ.
Аллина Тоярова ханшам потар
Авторы
Лух Авт
Темы