Лух Авт
Яӆап хуӆ мощатты ӆэсятыӆув
Там ятан ЯНАО АПК Департамент хося рупитты ёх хуӆ веӆпасӆаты тахаята яӊхты ӆэсятыӆат, хоты хуӆ потаӆтаты хотат, ӆашкупат, катьрат ӆэсятӆайт, вантты утсиӆат. Муй хорпи нётопса мосмитаӆ, ӆэрапӆат. Ӆуӊ веӆпасӆаты пора — мет воӆаӊ пора.
Мет оӆаӊан кусяйт Салемальской па Аксарковской рыбозаводата яӊхӆат. 2025-мет таӆ сыс округеван нийӆ районан нийӆъяӊ хуӆ мосятты тахайн яӊ сёрс тонна хуӆ мийман уса.
Хасям ӆуӊан ун йиӊк шеӊк хув катӆасас. Рупитты хоятӆаӆ планӆаӆ ищи па тэкаптасӆаӆ. Мет ар хуӆ Тазовской район мас — 1892 тонна. Кимет тахая Приуральской район этас — 1855 тонна хуӆ ӆэсятас. Ӆорвош район хуӆмет тахайн, 1761 тонна хуӆ мас. Мет ар сорт ус, 646 тонна моӆтаскем мосятсат. Там таӆан, яӆап таӆ тыӆась оӆаӊмет хатӆ эӆты йи тонна мосятты хуӆаӆ 13% эӆатса, ох сирн, 136 сёрс соӆкувая хойӆ. Хасям таӆан Заксобрание куся ху Сергей Ямкин, хуӆ веӆпасӆаты ёх пиӆан уйтантыман, номас понтсат, сохаптаты охаӆ айшукие эӆатты.
Хоты таӆ хуӆ веӆпасӆаты пора Горка вош рыбозаводан Ӆоркурт рыбоучасткан манаӆ, Иван Тимофеевич Яркин ясаӊ верас: «Ай кер тыӆасян таӆ веӆпасӆаты пораев етшаптаӆэв. Тыӆась сютсяӆув, си юпийн ӆуӊ порая ӆэсятыӆув. Таӆ пораев яӆап таӆ тыӆась эӆты ай кер тыӆась унты манаӆ.
Асэв потты юпийн, Ас потты тыӆась эӆты Альберт апсем пиӆан хоӆпат омасӆаман. Таӆан пиӆаӊа рупитӆаман, яха кеншак. Ӆуӊан ӆув атэӆ, ма атэӆ. Там мосванан паннэ мосятты ураӊан Ас кутопан ветхосьяӊ метрайӊ кат хоӆап опсыӆысман, ин нох вусӆаман. Тыӆась моӆтас пунат омасты питӆаман. Сютсяты хатӆат эӆты яӆап таӆ тыӆась сыс ветхосьяӊ хуӆы хир маты ӆэсятсаман. Ар пелак паннэ па сорт мосятыӆысман».
Еӆӆы этты газетаятан ханшӆув, хоты таӆ веӆпасӆаты пора манаӆ. Там ӆаварт рупатайн, иськи, вот порайн, хуӆ веӆпасӆаты хоятӆув хоӆапӆаӆ аршак хуӆан ат хойӆайт, маты хуӆӆаӆ ураӊан аршак охан ат сохаптаӆайт.
Альбина Тырлина ханшам потар
Авторы
Лух Авт
Темы