Лух Авт
Яӆап щирн ханты ясӊа утаӆтаӆӆам
Там ванан Тэк куртаӊ ашкуӆайн няврэмат ханты ясӊа па рут литературая утаӆтаты нэ Олеся Вячеславовна Хандыбина пиӆн уйтантысам. Ӆув ар таӆ щи рупата туӆ. Тэкн сэма питас, щита энмас, Ёмвошн ун нэпекаӊа ювмаӆн, рупитты ёхи ёхтас.
Муй щирн там йисан рут ясӊа утаӆтаты вер ӆэщатӆ, щит эӆты айкеӆ верас.
– Ванты, ин там хатӆатан, ёӆн рут ясаӊ ант щащӆ. Антет-ащет няврэмӆаӆ пиӆн рут щирн ант потарӆат, щишн эвет-похат ханты ясаӊ ант тайӆат. Муӊ, няврэмат утаӆтаты ёх, рупатаев яӆап щирн ӆэщатӆэв. Интерактивной сохаӆ хоща умащ урокат туӆув. Щи тумпийн арсыр касапсэт ӆэщатӆув, тухаӆ отат антет-ащет пиӆн верӆув.
Муӊ ашкуӆаева куртаӊ уна ювам ёх мойӊа ёхтыӆыӆат па няврэмата ӆув уӆапсаеӆ, рупатайӆаӆ эӆты потарӆат. Щаӆта арсыр ханты пормасат верты харат рупитӆат, верантты ёх арсыр мосты пормасат верты няврэмат утаӆтаӆат.
Там таӆ ун кер тыӆащ 30-мет хатаӆн веӆщи Россия мувев шоши мир хатӆ постасув. Щи хатӆ сыс «Ханты ёх» (ай няврэмат), «Каркам ёх» (ун классатан утаӆтыты няврэмат), «Ун ёх» (утаӆтаты ёх) па «Тэк ёх» (куртаӊ ёх) командайт кутэӆн номпсаӊ касапсэтан кассат.
Кашӊ таӆ рут ясаӊ хуват олимпиадайн касӆув. Суматвош район касапсайн кассув. Тампуш 9-мет классан туп кат эви ус, ванты, йи эви нэман ӆэщатам программа хуват утаӆтыйс, щишн округ касапсая вохты нэпек ант китсув.
Олеся Вячеславовна ястас, ям арат таӆ ёхӆы «Ас нэ» нэмпи арыты группа куща нэ Анастасия Алексеевна Новьюхова «Ай Ас ёх» нэмпи няврэмат арыты-якты группа ӆувеӆа еӆӆы туты партас.
– Ванты, ин Анастасия Алексеевна щутщаман уӆ, щишн ӆувеӆа ӆаварт ипуляӊ кат таха туты, щишн «Ай Ас ёх» нэмпи арыты-якты няврэмаӊ таха манэма еӆӆы туты партас. Муӊ ашкуӆаевн етн эвет-похат пиӆн актащӆув, ханты ясаӊан арат арыты па якат якты утаӆтыӆув, щи тумпийн монщат хуват вантапсайт ӆэщатӆув. 9-мет класс етшаптам эвет еӆӆы колледжата утаӆтыты манӆат, щишн ай классат эӆты яӆап няврэмат вуӆам. Ай эвет-похата шеӊк умащ рут ясаӊан арыты па якат якты. Ин там «Охшамаӊ як» утаӆтаӆув. Муӊ, ванты, ром Ай Ас хонаӊан уӆӆув, щишн муӊ хощаев якат рома якӆат, «Куренька» як ищи айӆтыена якӆув.
Тэк куртан уӆмемн няврэмат манэма етнхот альсат, шеӊк умащ вантты ус. Утаӆтаты хоятата па няврэмата ун пумащипа ястаӆам.
Людмила Шульгина ханшам потар
Авторы
Лух Авт
Темы