Лух Авт
Яӆап таӆан этты яӆап верат
Хащам таӆан муӊ ханшиӆысув, муй хорпи верат яӆап таӆ кеша постасайт. Ин па ханшӆув нумты ураӊан. Нумастэман, щи порайн кашӊ хоят нумты питаӆ, па моӆты вер сахат утхота яӊхиӆыйӆ.
Яӆпа питам таӆ вуш эӆты «Чумовой капитал» тащан яӊхты ёх кимет няврэм сэма питтаӆ вуш эӆты вуйӆыты питӆат. Мет оӆаӊан там нётопса туп ар няврэмаӊ хоттэӆат вуйӆыты верытсат. Там нётопсая ӆоӊаӆман уӆӆат нюкет, парщин, улат, ухӆат, кур, хотхар сохӆат па па мосты пормасат. Ӆорвош районан уӆты мохет хот омасты пормасатан ортӆайт, сохӆат, картӆуӊкат, нови тут маты хошапатан, юх эватты картэтан, куран маӆайт.
Касӆыман яӊхам мохет, хой уншак куртата па вошата манӆат, кочевой охан сохаптаӆайт, ин 5000 соӆкува яӊ моӆтас щёрас хоят вуйӆыйӆ.
Ветеринарной хошапат яӆап портунатан понман уӆӆайт. Щи веран вуӆэт па ампат тумтакат питӆат. Тови па сус леп кашӊ пуш портунаӊ хошапат мийӆыты питӆайт.
Тащан яӊхты мохиӆув няврэмат, хой ашкуӆа юпийн ун тахая утаӆтыты манас, йи пуш 80000 соӆкува нётопсайн маӆайт. Щи охӆаӆан ӆув верытӆат ӆувиӆаӆа мосты ӆуматты сохат па утаӆтыты кеша мосты пормасат ӆутты.
Ямальской колледж яма етшам няврэмат 100000 соӆкува ёша паятӆат. Щи веран сот балл шитты мосаӆ. Ӆувиӆаӆ утаӆтам нэӊат па ёхат ищиты мойӆаптаӆайт.
Мис йиӊк ин куртаӊ хоятат ищи ёша паятты верытӆат молочной сертификат онтасан. Ӆув куртэӆан ки антом, па курта яӊхты верытӆа па щита вуты. Там еӆпийн верытысат леккар хотатан вуйӆыты.
Ай куртат эӆты, хота 500 хоят эӆты шимаӆшак уӆ, ӆувиӆаӆа рахты курта па воша манты верытӆат. Соцнайм щиран уӆам хоятат ищи хорпи уӆты хотан маты верэӆ уӆ. Кашӊ хоят вер атэӆ вантӆа. Касаӆты порайн 100000 соӆкува нётопсайн маӆайт.
Леккарат, няврэмат утаӆтыты нэӊат-ёхат, ТЭК хоща рупитты мохет, хой колледжан рупитаӆ яӆап таӆ оӆаӊмет хатӆ эӆты йи миллион соӆкува нётопсайн маӆайт.
Вой леккарат ищи нётопса вуты питӆат. Ветеринарный фельдшер 500000 соӆкува нётопса вуӆат, ветеринарной врач — 700000 соӆкува.
Хащам ятан округ губернатор Дмитрий Артюхов постас, хой хольмаӊ таӆ унты няврэм тайты ки питаӆ, щи нэ хуӆам миллион соӆкувайн маӆа, хольмаӊ таӆ моӆтаса ювам нэӊат йи миллион соӆкувайн маты питӆайт.
Няврэм сэма питты порайн леккар хотан мойӆапса ӆаращат мийӆыӆайт, щи порайн ант мосаӆ нумасты, няврэм муйн ӆуматтаты. Оӆаӊ сыс сохан тарамӆайт. Щит, ма нумастэман, шеӊк ям вер.
Муй хорпи яӆап нётопсайт Овс мув шимӆаӊ мир хоятат ураӊан па постаӆайт, муӊ па ишан па ханшӆув.
Аллина Тоярова ханшам потар
Авторы
Лух Авт
Темы