Лух Авт
Яӆап таӆан – яӆап нётопсайт
Овс мув шимӆаӊ мир хоятат ураӊан, яӆап таӆ питщаты вуш эӆты, постам нэпек щиран яӆап нётопсайт маты питӆайт. Там таӆан кущайт хуӆ веӆпасӆаты ёхӆув пиӆан уйтантысат, щи порайн верам потрат эӆты ныты питса, муй па мосаӆ уӆапса кенашак верты ураӊан.
Яӆпа ӆутты нови тут маты пормасат сахат 59% ох ёхӆы маӆа, ӆув тынаӆ 30 щёрас уӆты вераӆ уӆ. Тутъйиӊк сахат 58% маӆа, таӆ сыс 12 щёрас туп ӆуӊатӆа. Щи тумпийн регстандарт щиран йиӊкан ущӆыты порхаӊ кат пормас, муй па, хоят щитат ки ӆутас, ёхӆы хут щёрас соӆкувайн маӆа.
Там еӆпийн ӆапат муниципалитет хоща уӆты хуӆ веӆпасӆаты ёх пиӆан кущайт уйтантысат. Аратаӆан хольмаӊ пеӆа кат пуш потар верыӆысат. Округеван Овс мув шимӆаӊ мир хоятат хоща 49 щёрас ӆуӊтасаӆ. Касӆыман 17 щёрас моӆтас хоят яӊхаӆ. Нийӆ тыӆащ сыс 5 щёрас хоттэӆ нётопса вус. Хуӆам щёрас туп ул мийман уса, кат щёрас моӆтас портунаӊ ӆаращ, 630 юх эватты карты, 260 кур, 360 нови тут маты пормас, 41 щёрас моӆтас хоӆап, нуй па парщин хот лаӊкты ураӊан.
«Региональной стандарт — щит архорпи нётопса муӊ шоши хоятӆув ураӊан. Щи онтасан касӆыман яӊхты мохиӆув уӆапса кеншака йиӆ. Уйтантымев порайн муӊ тащан яӊхты па хуӆ веӆпасӆаты ёхӆув пиӆан йи ясӊа, йи потра ёхатсув — муй мосаӆ Овс мув шимӆаӊ хоятӆува», — шоши мир хоятат туӊматты верат департамент куща Ульяна Каленюк ястас.
Тамащ нётопсайт Ямал муван 2017-мет таӆ эӆты верӆайт. Щий хольмаӊ пеӆа няӆ пормас ӆоӊаӆман уӆӆа. Щи веран шоши хоятӆув ох такӆы щитат ёша паятты верытӆат.
Щёхар тыӆащ оӆаӊмет хатӆ вуш эӆты Госуслуги хоща Овс мув шимӆаӊ мир хоятат ураӊан маты нётопсайт ханшман уӆӆайт. Ин кашӊ хоят верытаӆ щий ӆоӊтыты па мосты нётопсая нёртыты. Пормасат ёхаттэӆ порайн, мосаӆ куртаӊ утхота паспорт пиӆан яӊхты па пормасӆан вуты. Хой моӆты щиран Госуслуги хоща ӆоӊты ант ки верытаӆ, ищи утхота яӊхаты, щита рупитты хоятатан ат нётӆайты.
Аллина Тоярова ханшам потар
Авторы
Лух Авт
Темы