Лух Авт
Яӆап уӆапса щират ай куртатан па верӆайт
Яӆап уӆапса пиӆан йи курн йи ёшан уӆты ураӊан Интернет туты карты ӆэрат хуван уӆты ай куртата па таӆӆайт. «Устранение цифрового неравенства» программа рупитты щиран щимащ вер кена йис.
Там ванан Ёханован щимащ мутра па верса. Оӆаӊ рупатайӆаӆ таӆ порайн ӆэщатты питсайт. «Ростелеком» хоща рупитты хоятат таӆ юш хуват мосты пормасат машинайн курта ёхтаптасӆаӆ. Юшан манты порайн хува ныты паӆ карты вышка ӆэщатсэӆ. Ӆуӊ сыс па базовой станцияйӆ рупитты щира яха оӆсэӆ.
Интернет верам юпийӊ, хуван уӆты рут хоятат пиӆан щепан тайты телефон хуват рахаӆ потрэматы, щаӆта па хор пуншман йи ещаӆт вантман потартты, матты ки хоятэн там ванан ӆойӆ. Хоят кашийн ёхатты порайн леккар хота айкеӆ верты, ищки нёӊхал хатӆатан няврэмат ёӆан омасман утаӆтыты верытӆат, вер сахат арсыр рупитты хотата потрэматы, мосты сайтата ӆоӊман нэпекат ӆэщатты. Машинайн таӆ юш хуват манман, моӆты вера питты порайн интернет па шеӊк мосаӆ.
«Яӆап уӆапса щиран айӆат ёх па энамты няврэмат оша щах ант пайтӆэӆ муй щиран рахаӆ уӆты, хун телефон па интернет антом. Муӊ хоты утӆам отат, катра уӆапса щиран хоӆна верытӆув. Вер сахат хоты, яна щи, щимащ вер шеӊк мосаӆ. Уӆапса па йи тахайн хун ӆойӆ», — Ёханов куртан уӆты Альбина Ивановна Озелова (Тогачева) ястас.
Дмитрий Щелгачев, округеван рупитты филиал ПАО «Ростелеком» куща ху ястас: «Муйкем хув тахайн хоят ант кепа уӆ, кашӊ ай куртан, кашӊ хотан интернет верты мосаӆ. Хоӆ пеӆа потрэматы порайн уӆапса кен па хоятэн ищи мосмаӊа йиӆ. Округеван хоӆна ар щимащ ай курт уӆ. Ин еӆӆы ур муват пеӆа па манты мосаӆ. Ван ӆуӊ сыс кум шитты мосаӆ ар рупата верты».
Зоя Куртямова ханшам потар
Авторы
Лух Авт
Темы