Лух Авт
Яӆап ӆуӊтап мира этаӆтаса
Ас нопатты тыӆащ хольмаӊ пеӆа ветмет хатаӆан Пулӊават вошан уӆты Национальной библиотекайн, «Сказки дедушки Ивана» нэмпи ӆуӊтап мира этаӆтаса. Щи нэпек рущ па ханты ясӊатан ханшман уӆӆа.
Щита «Ёрхо» па «Волшебная бандура» нэмпи монщӊан ӆоӊаӆман уӆӆаӊан. Ӆуӊатты умащ ураӊан хорат Дарья Вануйто, Зоя Худи па Максим Чаглей ханшсат. Монщат ханты ясӊа Геннадий Кельчинна кератсайт. Хоты там рупатайӆ Геннадий Павлович версаӆӆы, каматса ясаӊ ястас: «Кат монщан мийӆысайм, ханты ясӊа толмащты ураӊан. Шеӊк па мув мир хоятат монща сухтаман уӆӆат. Ванты муӊ, хуӆам охпи кулят ант тайӆув. Муӊ хощаев Ялань уӆ. Щишан там этам нэпекан ма щиты айӆсэм. Хуӆам охпи Ялань. Катра па ин рущ мир хоща, ох — щит куща. Кат ох — кат вуш уншак куща, хуӆам ох — хуӆам вуш уншак куща. Мосаӆ моштаты, хун аршак ох — мет воӆаӊ куща.
Оӆаӊ монщ — «Ёрхо», ханты щиран па питаӆ — Юр ху. Пох лэӊки иса уваӆ-уваӆ. Ун яяӆан ким лукемаӆа, кимет яяӆан па ёхӆы вуӆа. Щи ястаӆ: «Ма муя хоӆӆасам? Ванты ляль муӊ хощаев йиӆ». Кимет монщ — «Волшебная бандура». Муӊ щимащ шуп ант тайӆув па, щишан нарасъюха версэм.
Хун ханты монщат рущ щира понӆайт, щита номас таӆаӊ тэӆан ант ӆарпитӆа. Куш «ӆов» вуя, хоты «Мукарэӊ ӆовие». Щита век па номас понман уӆӆа. Ӆов — щита номас понман ус тутаӊ хоп. Там йиса ки керэматы, ищимет «Орешник». Муӊ йис арат, ӆоӊаӆтопат тайӆув, хота ханты мир катра уӆапса альман уӆӆа. Щишан ӆувиӆаӆ туп ясаӊ па ош тайты хоятэван туӊа-щира рущ ясӊа кератты верытӆайт. Вольняя толмащман — рахаӆ няха питты.
Ма нумастэман, там толмащам нэпекӆам, пора хайман туӊа-щира оша понӆайт, моштаӆайт. Няврэмӆуван щи веран ясӊев шавиӆа па еӆӆы туӆа».
Аратаӆан йи щёрас ӆуӊтап этас. Номас понман уӆӆа ашкуӆаята, ай няврэмат шавиты хотата па библиотекаята округ ӆоватан китты. Щи веран, ӆаӊхаты няврэмат, ищипа ханты ясаӊан ӆуӊтыӆыӆӆаӆ, оша поныӆыӆӆаӆ.
Аллина Тоярова ханшам потар
Авторы
Лух Авт
Темы