Лух Авт
Яӆап утаӆтыты таӆа актащиман
Там пуш округ ӆоватан нумасӆа 3300 няврэм ашкуӆа-интерната туты. Унт ӆор тыӆащ 23-мет хатӆ вуш эӆты щёхар тыӆащ 6-мет хатӆ унты хоӆ акатӆайт. Хой тохӆаӊ хопан, хой машинайн, хой па тутаӊ хопан ёхтаптаӆа. Ашкуӆа эӆты ван куртатан уӆты 745 няврэм аӊкетан-ащетан туӆайт.
Мет ар няврэм Ямальской район эӆты — 1255 хоят, Тазовской район — 955, Пуровской — 471, Кев сыӆ — 439. Ӆув кутэӆан 1043 — щит ашкуӆая веӆщи манты отат. Ун рупата верӆа няврэмат оӆаӊмет класса манты кеша. Муравленко, Кев сыӆ, Ямальской, Тазовской па Ӆорвош районатан няӆхощъяӊ ашкуӆа-интернатан няврэмат пиӆан щи кеша понам хоятат рупитсат. Сот нийӆъяӊ няврэм яӆап куртаӊ уӆапсая ӆэщатса.
Туняӆ Белоярск, Гыда, Антипаюта па Мыс Каменный ашкуӆа-интернатан няӆъяӊ няврэм вет тыӆащ сыс ашкуӆа-интернатан ус, хой там пуш оӆаӊмет класса манаӆ. Ин нумасӆа хонна хуӆам няврэм похал Аксаркайн, Салемаӆан па Новый Портан акатты.
Хоӆ муӊ уйтӆэв, хоты ӆаварт аӊки-ащи хот эӆты яӆап тахая питты. Яӆап ӆуматты сох, ӆэтот, пиӆат хоща ищи утаӆты мосаӆ. Ин там йис ашкуӆа-интернатат щикуш хоттэӆ иты верман уӆӆайт, туп ай няврэмат ищипа марэмаӆайт, ёхи ӆаӊхаӆайт.
Кум шиттыйн аӊкет-ащет няврэмӆаӆ хоща ёхтыӆыты питӆат. Няврэмат па потартыты, хоты яӆап хотан уӆӆат, муй хорпи посат утаӆтыты щиран тайӆат. Няврэмата ястаӆув, яма утаӆтыяты, нэмоӆты щир эӆты аӆ паӆаты, аршак ям ӆухас па пиӆнэӊ уйтаты. Аӊкиӆан па ащиӆан амтатӆыяты, нынан утаӆтыты хоятӆан туӊа-щира хуӆантыяты.
Аллина Тоярова ханшам потар
Авторы
Лух Авт
Темы