Лух Авт
Ямал муван манты верат эӆты потар тус
Хащам ӆапатан Якутск вошан V Овс мув форум манас. 500 эксперт 17 хон мув эӆты ияха актащисат. Щита ЯНАО Законодательной Собрание Комитетан рупитты, «Ямал-потомкам!» Ассоциация куща Эдуард Яунгад потар тус, муй хорпи нётопсайт Ямал муван касӆыты хоятат ураӊан верӆайт.
Хутъяӊ харан потарса мув ӆоӆаты, кутӆаӆан верты рупата Овс мув уӆапса туӊматты, ясаӊ па шоши хоятат уӆапса шавиты па еӆӆы туты верат эӆты.
«Тамащ уйтантопсайт муӊева шеӊк мосӆат. Па регионат па хон муват хоща манты ямшака манты верат муӊ хощаев ищи верты верытӆаӆӆув. Арктика па ЯНАО хоща уӆты хоятат уӆапса кеншака манты ураӊан хонна ар рупата верты мосаӆ.
Арпелак законодательной верат — щит кущайт па шоши хоятат пиӆан верты уйтантопсайт. Щи веран мет хув тахаята яӊхиӆыӆув, касӆыты хоятат пиӆан уйтантыӆув, потрэмиӆув, ӆув муӊиӆува потарӆат, муй хорпи верат ханшты мосӆат. Иса постаӆӆув па нэпекат ӆэщатӆув, закон рупитты щира туӊматӆаӆӆув. Кашӊ хоят уйтантопса тумпийн верытаӆ телефон, интернет мохты кущаята ясаӊ верты, муй па КМНС общественной организацияйт, утхот мохты», — Эдуард Яунгад ястас.
Ямал ӆоватан 48 щёрас Овс мув шимӆаӊ мир хоят уӆ, 18 щёрас касӆыман яӊхаӆ. Кашӊ кимет семья — ар няврэмаӊ.
Няӆъяӊ моӆтас нётопса шимӆаӊ мират ураӊан округан рупитаӆ. «Чумовой капитал» кашӊ пуш яӆпитӆа. Яӆап таӆ тыӆащ 1-мет хатӆ 2025-мет таӆ вуш эӆты кимет няврэм сэма питтыйн иса мосты пормасан «чумовой капитал» мохты маӆайт.
Овс мув шимӆаӊ мир хоятат уӆапса щуняӊа па ойӊа манты ураӊан 30 закон па 50 моӆтас подзаконной акт рупитаӆ. Федеральной законат ӆэщатты порайн Ямал мув ямшак верат тохи ӆоӊаӆӆайт.
Аллина Тоярова ханшам потар
Авторы
Лух Авт
Темы