Лух Авт
Ямал мувев губернатор ясаӊ китас хоты верат шоши мувевна манӆат
Моӆхатӆ Дмитрий Андреевич Артюхов Ямал мувев депутатата, уӆты па рупитты хоятат пеӆа ун ясаӊ китас, хоты хащам таӆатн верат мантсат па хоты еӆӆы уӆты номас тайӆув.
Ляля манам ёх кеша
Мет оӆаӊ потар манас хоты муӊ шоши хоятӆув няӆ таӆ сыс СВО ляль хоща юрӆаӆ понӆаӆӆаӆ. Сишн, ӆув ураӊӆаӆн па хоттэӆ ёхӆаӆ кеша ар юр верӆув па нётӆув. Аратӆ 70 моӆтас нётап верман уӆ. Тампуш ӆуӊ эӆты яӆап проект пуншӆа — «Своих не бросаем». Щи щирн ляльн уӆам хоттэӆ ёх кеша Россия хон мувев ӆоват каш вер па сютчапса ӆэщатӆа. Щи тумпина ляля яӊхам ёх пеӆа нётап туты питаӆ нэман понам хоят — Артур Жумабаев.
Яӆап хот омасты верат
Кашӊ хоята мосаӆ ям па хошам хот. Щи щирн округ ӆоватан катра, ӆыйм хотат нох лосатӆайт па ун хорам хотат этӆат. Туняӆ 1 миллион квадратной метра яӆап хотат уӆты масаят. Ин па яӆпа номас понтсув — па яӆпа миллион квадратной метра хотат ӆэщатӆув. Ин Ямал мувев ӆоватна 227 яӆап хот омасты питса. Яӆап программаят этсат — «Жилищный капитал молодой семье» па «Арктическая ипотека».
Юшат яммаӆты верат эӆты
Тампуш округ ӆоватна муӊ ӆытӆаюв 100-кем арат километра юшат яммаӆты. Ин там ӆуӊан мет ун мосты юшев Пулӊават эӆты Надым унты верты етшаптаӆэв. Па иса ям, пайӆы юш эӆты яӊхты питӆув. Щаӆта, Пулӊаватна, тампуш яӆап аэропорт омасты питӆа. Щи тохӆаӊхопат кеша ӆэщатом хот мет уна йиӆ па аршак хоят хоӆта рахӆ тутлиты.
Сыстам йиӊк па хошам хотат
Туняӆ таӆн 30 километра теплотрассаят яммамӆсаят. Щаӆта яӆап газовый котельныят Ӆапатнаӊк, Тазовской, Тарко-Сале па Толька нэмпи вошатн версаят. Новый Уренгой вошан 2 котельный яммаӆса. Тамащ рупата мосаӆ кашӊ таӆ яма верты. Тампуш таӆэв ӆапат тыӆ сыс мет ищки ус.
Яӆап, йиӊк сыстапты хотат этсат Яр-Сале, Панаевск, Правохеттинский, Тазовской, Мыс Каменной, Тарко-Сале, Надым па Ӆапатнаӊк вошатн. Тампуш Салемалн па Ныдаян щи рупатайӆув етшаптаӆув, папуш па Пангоды хоща.
Донбасс мува нётӆув
Туняӆ Авдеевка вош яммаӆсэв, тампуш па Волноваха хоща вошхулэт па хотат ӆэщатӆув. Щи тумпина Воӆаӊ ляль 16 памятник ар куртатн нох версаӆув. Щаӆта Свято-Успенской Николо-Васильевской монастырь Никольское нэмпи вош хоща яӊхас. Щи поп-хот атом соӆтанатн орытам па тутна ёсам. Тампуш эӆты ӆувеӆ нох ӆэщатты питӆэв.
Шоши шимӆаӊ мир хоятӆув ураӊна
Туняӆ хорты маты нёха тынӆ эӆатсэв. Сишн, тампуш вуӆэӊ ёх аршак шоши нёха маты питсат. Щиты, тампуш муӊ шеӊк ар нёха ӆэщатсув — 3 щёрс 300 тонна.
Ӆуӊан па Сергей Миронович Ямкин рупитты ёхӆаӆ пиӆн веӆпасӆаты панат па куртат хоща яӊхас. Щи эӆты яӆап нётап этас — веӆпасӆаты хоттэӆ ёх кеша 2 спасатальной жилет маӆа, тутъйиӊк ӆутты ох 7 щёрс эӆты 12 щёрс соӆкува унты эӆатса па тут машина ӆутты ураӊна ин 30 щёрс соӆкува ёхӆы маӆа.
Хоӆна еӆӆы ар рупата мосаӆ верты: утаӆтыты вер, ай куртатан рупата харт ӆэщатты па яӆап хотат мосӆат верты.
Няврэмӆув кеша
Ямал мувев ӆоватна муӊ иса няврэмӆув кеша хуӆмет таӆ ям ашкуӆаят верӆув, хатӆ сыс шакиты хотат яммаӆув. Щиты муӊ Новый Уренгой, Ӆапатнаӊк, Муравленко, Мужи па Харампур вошатн ашкуӆаят яммаӆсув. Губкинской вошан яӆап ашкуӆа омассув. Гыда вошн няврэмат уӆты хот кимет ашкуӆа-интернатан версув. Хоӆна ар яӆап ашкуӆа па хатӆ сыс няврэмат шавиты хотат яӆпа верты питӆув. Щи тумпина ашкуӆа няврэмӆува мосаӆ еӆӆы утаӆтыты, сишн колледжат хоща аршак рупитты щират верӆув. Ямал мувев ошаӊ рупитты хоятат шеӊк мосӆат.
Еӆӆы уӆапса тумтака туты мосаӆ
Муӊ мувевна ар ай няврэмат сэма питӆат. Россия хон мувев ӆоватна муӊ щи щирн 3 местайн уӆӆув. Хоттэӆ ёх хоятӆув аршака йиӆат. Щит шеӊк ям. Сишн, тампуш эӆты муӊ семьяята хота 3-мет няврэм сэма питаӆ 1 миллион соӆкува ох маты питӆув.
Тумтак уӆты ураӊна муӊ ар леккар хоттат верӆув: 5 таӆ сыс 14 яӆап больница омассув, 84 — яммаӆсув, па ай куртатан 28 ӆонщсув. Ин па тампуш хоӆна яӆап леккар хотат верты питӆув. Щи урӊа ошаӊ ун леккарат кашӊ больницая рупитты вохӆув. Ат Ямал мувевна хоятат тумтака уӆӆат!
– Муӊев щимащ поддержка верас губернаторэв Дмитрий Артюхов, малаян масаятна аӆаӊ олаӊна, хунты йиӆан няврэм тайты хатна амые эӆты па щит нэмаӆ «Ямальской матери». Щи юпина юхы манта питы порайна няврэмиен ищи мала масаятна «Малышу Ямала» нэмаӆ. Щит век ям верат, мув сеӊк ям, хунты мув ханты каӆаӊ ныӊӆув ор хат эваӆт йитэӆна, ӆувиӆаӆ век ям анты, — ястаӆ ар няврэм тайты амые Яаа Максимовна Тайшина Охсарка вош эӆты.
Иван Сандрин ханшам потар
Авторы
Лух Авт
Темы