Лух Авт
Ямал мувна «Земский тренер» программа пунсӆа
Ямал мувна физической культура па спорт хоща ропытта йиты нэӊхэт хущты ораӊна йиӆап нятапсы этас. Ропытта эттэӆ порайна йи миллион соӆкувайна мата питӆайт. Итта щимащ мера тренер-преподователят ораӊна мата питӆа, щиты олман холна мета маса ропата щи лоӊта веритаӆ.
«Земский тренер» программа 2025-мет таӆна Хон мув Президент Владимир Путин пунста партас. Щит, ай васатна, хата 50-кем щёрс нэӊху ол, нэӊхэт вуӆ васат эваӆт ропытта ат йиӆат. Ямал мувна па, губернатор Дмитрий Артюхов щи программа холна па вуӆамтта партсаӆӆы, ай похлат па щита ат лоӊӆат.
«Ямал мувна «Земский тренер» программа пунста ӆэщатыӆу. Муӊ ӆувеӆ вуӆамӆэв: анта топ ай похлатна ропытты нэӊхэт вахлу, вуӆ васатна па — щит Новый Уренгой па Ноябрьск. Муӊ региону хуват сэӊк ар ям касты хар пунсӆа — касӊ васна па похална «Северный характер» касты харат этӆат. Пулӊавтна мет вуӆ спорткомплекс «Ямал-Арена» верӆа. Новый Уренгой па Ноябрьск васӊанна «Факел» нэмпи харат пунста ӆэщатыӆат. Пунсантэӆ юпина, щита ропытты нэӊхэт сэӊк маста питӆат. Ма номастэмна, там программа онтасна, муӊ хощев ар номсаӊ нэӊху ропытта ёхатӆ», — Ямал губернатор Дмитрий Артюхов лавас.
Щимащ нятапсы ясна пайтты ораӊна конкурсный отбор манта маста питӆ, мет алаӊна собеседование, щи юпина ропытам таӆӆаӆ вантӆайт, хата онттыйс, спортивной рязряд, ишакты нэпекат па знак отличия ат тайӆ.
Конкурсной отбор унт ӆор тыӆащ 1-мет хатӆ эваӆт пинтщаӆ, щит пущщи Ямал мув физической культура па спорт сайт хоща вантта рахал.
Ямал мувна ропытта ёхатты нэӊху, партам организацияйт эваӆт ӆувеӆ рахты таха пирыта веритаӆ па яха ропытты нэпек ханста.
Вера Лонгортова хансам потар
Авторы
Лух Авт
Темы