Лух Авт
Яӊмет энамты ёх форум манас
Ӆорвош районан «Наше время» энамты ёх форум яӊмет пуш верса, ӆапатхосьяӊ проект этаӆтыса. Хут проект нох питас, ияха хутсот сёрс соӆкува шитсат.
Кашӊ таӆ там уйтантопсая район куртат, округ па па регионат эӆты энамты няврэмат ёхтыӆыӆат. Там пуш па муват — Замбия, Албания, Перу, Коста-Рика па Волноваха эӆты мойӊ хоятат усат.
Асов куртан уӆты Таслима Ильясова «Аканяӊ ёнтты вантапса» проект этаӆтыйс, — 90 сёрс соӆкува шитас. Гита Терентьева па Юлия Смирнова, Овкуртаӊ нэӊӊан, куртэӆ постаты 130-мет таӆа ӆэсятыты уйтантопсаята 110 сёрс соӆкувайн масайӊан. Диана Зяблова, Мужи вош эӆты «Инклюзивное образование» проект ураӊан 65 сёрс соӆкува ёша пайтас. Анна Рочева Ӆорвош нэӊие «Фестиваль семейной истории» рупатаеӆ кеша 50 сёрасан сохаптаса. 80-мет Воӆан Ляль постам хатӆа ӆэсятам проектаӆ ураӊан, Овкурт эӆты ёхтыӆыйм Елена Лаптандер, 70 сёрс соӆкувайн маса.
Си касапсайн мет ар грант ох — 140 сёрс соӆкува, Ксения Сюртахова Питлор эӆты, «Пормас шавиты хотан ӆарпитам хар» («Музейный уголок») проект ураӊан маса.
Ксения рупатайӆ па касты проектат эӆты ясаӊ верас: «Ма нэпек ӆуӊатты хотан нийӆ таӆ рупитӆам. Овс мув уӆапсаев самаӊа тайӆэм, си направление хуват рупитӆам.
80-мет Волаӊ Ляль постам хатӆа, нэпек ӆуӊатты хотан, емаӊ хатӆ еӆпийн, пормасат шавиты хот пуншӆув. Ар рупата версув: лялян уӆам хоятӆув эӆты потрат акатсув. Куртаӊ хоятат па няврэмат сита уйтантыты питӆат. Ар хорпи уйтантопсайт, мастер-классат, интерактивной экскурсияйт, урокат верты питӆайт.
Районэван манты форуман няӆмет пуш касӆам. Грант оха кимет пуш нэпекӆам китыӆысам. Рупатаем хуват «Арт-Таврида», «Буквоград», «Чумовые сказки», «Вехи памяти и славы» проектатан кассам. 700 сёрс соӆкува грант ох шитыӆысам. Рупатаем хуват кашӊ таӆ грант касапсайн касӆам».
Уйтантыты пора сыс ёхтыӆыйм экспертатан, район энамты ёх центран рупитты хоятатан ар рупата верман ус. Кашӊ ёхтыӆыйм хоят, муй там уйтапсайн хуӆас оша ат паятӆаӆӆы, постам верӆаӆ еӆӆы ат туӆ. Папуш симась тахая аршак проект ӆэсятты энамты ёх ат ёхтыӆыйӆ.
Авторы
Лух Авт
Темы