Лух Авт
Яңмет пуш ияха акатӆайт
Ас потты тыӆащ 20-23-мет хатӆатан Пулңават вошан Овс мув шимӆаң мир энамты няврэмат «Российский Север» уйтантопсая акатӆайт. Яртъяң таӆ сыс энамты няврэмат хон мув ӆоватан уӆты регионат эӆты яха актащӆат. Ямал муван 2022-мет таӆ эӆты уйтантыӆат.
Потарӆат па альӆат, хоты сахат шоши мир ёх уӆапса еӆӆы туты мосаӆ, ясаң шавиты. Рут ясаң ант уйтты хоятата альты па потарты, муй щиран щи вер сорашак верты рахаӆ, там йисан арсыр мутрайт уӆӆат, щи веран нётты ураңан.
Йис уӆапса шавиты ураңан турамсот проектат ханшӆайт па уӆапсая ӆоңаӆӆайт. Хащам ятан этнотуризм шеңк такан рупитты питас. Кашң ай куртаң хоят верытаӆ там рупатайӆ туты па мира этаӆтыты. Щи веран ай мираң уӆапса ант сохнаӆ па еӆӆы туӆа.
Энамты ёх па нэңат, хой ӆаңхаӆ там уйтантопсая ёхтыӆыты, «Молодёжь России» платформа хоща щёхар тыӆащ 20-мет хатӆ унты заявка нэпек китаты. Шоши мир няврэмат, 14-35 таӆа ювам хоятат, щий пиӆтащияты, ханты мир уӆапса хорасаң верӆан мира этаӆтыяты.
«Движение Первых» хоща уӆты мохиӆув, этноблогерат, ямас ёнтасты па вератты хоятат, ясаң шавиты па еӆӆы туты мохет, общественной движенияята ӆоңам няврэмат.
Камаста ясаң там уйтантопса эӆты Инесса Олеговна Яунгад ястас, ӆув там форуман воӆаң хоята уӆ. «Там форума энамты няврэмат яңмет пуш акатӆаӆӆув. Яртъяң таӆ сыс верам рупатаев артаӆаӆэв, щаӆта па «Российский Север» еӆӆы уӆапса постаӆэв. Там форуман па щи юпи хатӆатан шеңк ар рупата верӆа. Ма кашң пуш Овс мув шимӆаң мир энамты няврэмат пиӆан рупитӆам, еӆӆы па ӆаңхаӆайм, ӆуӆн ӆув ищиты шоши мир уӆапсаеӆ еӆӆы тусэӆ, нох аӆмисэӆ», — Инесса Яунгад ястас.
Там уйтантопсая пиӆтащты хоятата мосаӆ анкета нэпек ханшты па нёхты хор верты. Хой таӆаң тэӆан мосты верӆаӆ иса туңматӆаӆӆы, щи хоят вохӆа. Щи кеша нэпекан китӆа, айкеӆан верӆа.
Вет направлений щиран рупата оӆтӆа: этнотуризм, рут ясаң шавиты щир, энамты ёх сообществайт еӆӆы туты вер, «Российский Север» медиаресур верапса па йис уӆапса туты щир. Росмолодёжь конкурсан нох питты хоятат 1,5 миллион соӆкува шитӆат.
Щишан, пиӆтащияты, ӆухсаңа ювиӆыяты, мойӆапсайт шитыӆыяты!
Аллина Тоярова ханшам потар
Авторы
Лух Авт
Темы