Лух Авт
Ясңат толмащты нэпек этас
Мосванан «Национальной библиотека ЯНАО» хотан хоятата яӆап нэпек этаӆтаса. Ханты па рущ ясаңан ханшам ясңат «Словарь хантыйско-русский и русско-хантыйский» яӆап книгайн толмащман уӆӆат.
Там мосты нэпек хуӆам ханты нэңан ханшса: Марина Афанасьевна Рачинская, Тамара Яковлевна Прокина Хон Петра вош эӆты па Зинаида Иосифовна Рандымова Пулңават вошан уӆ.
Уйтантапсайн Зинаида Иосифовна ёхтам хоятат пеӆа потар тус, хоты там нэпек пиӆан рупата манас. Еӆпи там хорпи книгайт ханшман па усат. Туп щи нэпекат мосты щира ханшты мосас: оӆаң, ун классатан утаӆтыты няврэмата атэӆ книгайт, Кев пелак хантэт кеша, вуӆы хотан яңхты ясңат, ясңат хоща звонкой па глухой буквайт ат усат.
Ясңат толмащты яӆпа ханшам нэпек ӆыпеӆ хут щёрас ясаң тайӆ. Ясаңӆаӆ рущ, ӆорвош диалектан па Кев пелак хантэт потарты щиран ханшман уӆӆат. Ин пора ар яӆап ясаң па щита уӆ.
«Потарты па ӆуңатты порайн кашң хоят ӆув щираӆан ясңаӆ оша пайтӆаӆӆы. Там словарь этам порайн тухаӆ хоятат манэм потартты хошап хуват, хой па уйтантыты порайн ястаӆат, маты ясаң па щиран ӆуӆан ястасэӆ, маты ясаң моштасэӆ, тухаӆ па катра ясаң шияӆасат. Шеңк ям, щит мосаӆ потарты. Щиты муң уйтты питӆув, нэпекев ӆуңатӆа па хоятата мосаӆ. Пора хащты юпийн яӆап ясңат этӆат па тамащ книга яӆпа верты мосты питаӆ», — Зинаида Иосифовна ястас.
Ёхтам мойң хоятат мойӆапса ясаң рупата верам нэңата ястасат, Марина Афанасьевна нёхты хор хуват Хон Петра вош эӆты ясаң китас. «Сорни тутые» няврэмат нарасъюхатан нарасӆысат, «Овас мувие» нэңат ханты арат арысат. Уйтантапсая ёхтыӆыйм хоятат яӆап словарян мойӆаптасайт.
Зоя Куртямова ханшам потар
Авторы
Лух Авт
Темы