Лух Авт
«Йи ӆэр няврэмат» уйтантопса верыӆыса
Хащам ятан Тюмень вошан «Финно-угорской па самодийской хатӆат» мантсат. «Йи ӆэр няврэмат» нэмна понман ус. Ӆув рут ясаӊ шавиты щиран Международной десятилетияя постаса. Там уйтантопсая Югра, Ямал, Удмуртия, Марий Эл, Екатеринбург, Тюменской область хоща уӆты хоятат пиӆтащисат.
Натаӊ вош эӆты Ассоциация «Ямал — потомкам!» филиал хоща ӆоӊам хоятат яӊхсат. Ӆув «Торфянник» ДК хоща ун вантопса алиӆысат, щита уӆты хоятат ураӊан ӆэтотаӊ пасанат ӆарпитысат. Щита рахас нёхи, хуӆ эӆты верам турамсот ӆэтот, мурах, нянь уӊӆа хошкиты.
Ӆув тумпиӆаӆан, аратаӆ финно-угорской мир эӆты, ёхтам хоятат ищи ӆув тусӆаӆ этаӆтысат. Ямал мув хоятӆув саклопсат, аканят па па хорпи тус ёшан верам пормасат алиӆысат. Валентина Тибичи, Вера Эгамова там вантопсая турамсот пормас ӆэщатсат. Щи тумпийн ёхтам хоятат ураӊан мастер-классат алиӆысат, хоты туӊа-щира вератты мосаӆ.
Воӆаӊ уйтантопса верам порайн Тюменской дума эӆты Лариса Цупикова ёхтыӆыйс, Тюмень вош Администрация эӆты Платон Осоткин ясаӊ вуйӆыйс. Каш верты харат верам порайн няврэмат арысат, яксат. Муӊ муваӊ нэӊӆув ищи ёӆта ант ӆойсат. Галина Граблевская ханты ар сухтыӆыйс, Антонина Салиндер ур ясаӊан, Ольга Антипина саран ясаӊан арыйс.
Кашӊ хатӆ атэӆ мир уӆапса альман уса. «Ӆухсат уйтантопса» удмурт мир верыӆысат. Щи уйтантопсайн Галина Граблевская потартас, хоты Ямал муван шимӆаӊ мир хоятат уӆӆат. Ханты мир пормасат ёхтам хоятата алиӆыйс. Кашӊ хатӆ актащийм харан, кашӊ рут мир ӆув ясӊаӆан потартас, арыйс, монщас. Кимет хатаӆна марий мир «Мари кас» верыӆыйс. Щита рахас марий ӆуматты сохат вантты, арат хуӆантты, ӆув мир якеӆан якампты.
Тамащ уйтантопсайт шеӊк мосӆат. Па мувата яӊхман вантӆув, хоты па мир хоятат уӆӆат. Муй хорпи ям верат ӆув туӆат, ясӊеӆ муй юр понман шавиӆат. Ванты, хащам ятан вошан уӆты хоятат шимаӆ питсат рут ясаӊан потарты. Па мув эӆты ёхатты миратан муӊ уӆапсаев ванан тайӆа. Ханты мир тайты ернасат ӆуматӆат, ханты ар сухтапӆат. Муӊ ханты мирэва уӆапсаев па ясӊев еӆӆы туты мосаӆ, такан шавиты, па мир хоятата муӊева тутыя!
Галина Граблевская ханшам потар
Авторы
Лух Авт
Темы