Лух Авт
Йиӆап щират-пищат этӆат
Приуральской мувна йиӆап щират-пищат этӆат — Каӆаӊаӊ нэӊхэт емаӊ хатӆна ЗАГСна ропытты нэӊхэт выездной регистрация брака верта питӆат. Щимащ емаӊ хатӆ шоши мир нэӊхэт щират-пищат щирна манта питӆ.
Энамты нэӊхэт, хой йиӆап хаттэӆ верта ӆытӆ, заявление мата веритӆат, анта топ приуральской мув нэӊхэт, каман мув суӊ эваӆт аса. Щимащ регистрация Охсар похална Ас сыӆна верта питӆа, щи ораӊна ор хат сохла.
«Туняӆ муӊ хощев щи ӆампа воӆаӊ ям вер ос, муӊ ор хатна выездной регистрация брака версу. Ӆув муӊ нэӊхуӆу мет воӆаӊ емаӊ хатӆна манас — Каӆаӊаӊ нэӊхэт емаӊ хатӆна. Муӊ номасна поныӆыйм верӆу аса ямас мантсат, щитна тампус па щимащ церемония верта ӆытӆу. Тампус муӊ заявление маты пора аӆаӊсак пунста ӆытӆэв. Энамты нэӊхэт, хой шоши мир нэӊхэт щират-пищат щирна йиӆап хаттэӆ верта ӆытӆ, Ас сыӆна, ор хатна, ӆув самӆаӆна щит век хыщӆ», — Приуральской район загс коща ныӊ Ольга Сороквашина лавас.
Щи томпына, анта топ Каӆаӊаӊ нэӊхэт емаӊ хатӆна рахта питӆ, ӆуӊан па щимащ регистрация верта питӆат — Охсар похал стела хоща па Торам хат хощаӊна олты сосыӆыты харна.
Вера Лонгортова хансам потар
Авторы
Лух Авт
Темы