Лух Авт
«Йиңкиӆора» кашң хоят яңхты верытаӆ
Таӆ соханты унты нумасӆа «Йиңкиӆор» нэмпи харан хоятат яңхты юшат туңа щира ӆэщатты. Няӆъяң километра хуват уӆты питаӆ. Унт ӆор тыӆащ вуш эӆты щи рупата туты питса.
Ин, хащам хатӆатан, щи юша питты харан посат версайт, хуӆам ӆойӆтантыты хар. Каматса ясаң щита уӆты верат эӆты государственной инспектор, ведущий специалист Лазарь Михайлович Еприн ястас: «Муң «Йиңкиӆоран» тохӆаң войт па па сыр войт шавиӆув: овцебыкат тумпийн, охсарат, шоврат, кураң войт, ӆоӆмахат… Кашң пуш войӆув вантман тайӆаӆӆув, щёраскем гектар мохаӆман иса уӆӆув. Браконьерат ки мощатӆув, мохты протокол нэпекат ӆэщатӆув. Кураң вой веӆман яңхиӆыӆат.
Мосванан бизонат тусайт, аратэӆан катхощъяң вой. Ин ӆув хуӆам километра ӆоват верам коралян уӆӆат. Иса тумтакат, утаӆсат. Торн ӆэвман шушиӆыӆат. Ветхощъяң овцебык мосванан Магадан мува туса. Щита ищи вой шавиты харат уӆӆат. Щита еӆӆы рутмиӆат.
Хащам ятан тата туристат яңхты кеша юшат ӆэщатсув. 31 километр эӆты, щаӆта па еӆӆы 40 километра яңхты питӆат. Муң унтэв 130 километра моӆтас манты мосаӆ. Мет шопаң ӆуңан ар хоят мойӆатыя ёхтыӆыйӆ. Ар хоят Коми Республика эӆты уӆӆыйӆ. Щучье унты ёхатӆат, резина хопӆаӆан ов хуват манӆат, щаӆта муң хощаев хойӆат. «Мраморный» унты яңхӆат, Кев вантӆат, муй хорпи войт кащаӆаӆат — щитат умащӆаӆат. Тата щутщаты веран шеңк ям. Щишан ёхтыӆыяты, юр па щём акмаӆтыяты!»
Ин аратаӆ мир «Харбей» туңа щира щутщаты щиран ӆэщатты вер ӆаваӆӆат. Хота хоятат ӆуӆан верытсат хоӆты, хорама ӆэщатам юшат хуват шушиӆыты. Таӆ питщам вуш эӆты щий «Туризм и индустрия гостеприимства» проект щиран няӆсот хоят яңхас. Нын кум шиттанан ищи щий яңхаты, хорам мувев умащӆыяты!
Аллина Тоярова ханшам потар
Авторы
Лух Авт
Темы