Лух Авт
Йис пормасат тайты хот куща нэ айкеӆат
Суматвошан уӆмеман, районаң йис пормасат шавиты хота яңхсам, кущайӆ пиӆн уйтантысам па ӆый рупатайӆ эӆты ямкем хув мин кутэман потрэмасман. Тамхатӆ щи тахаев куща нэңа Алёна Васильевна Леонова тата мосванан йис.
Ӆув Суматвошан сэма питас, айтэӆн щита ус па энмас. 2001-мет таӆн кутап ашкуӆа етшаптамаӆ юпийн Тюменской государственной университетан вет таӆ утаӆтыйс. Диплом нэпек ёша пайтас па ёхи ёхтас. Мет оӆңа ӆувеӆ мосты вер ант верытас уяттыя па щит ураңан 2006-мет таӆ вуш эӆты Суматвошан нови тут вущитты тахайн рупитты питщас.
Щиӆта Ёмвош банк хоща рупитты манас, хота аратэӆн 12 таӆ ох ӆуңатты нэңа ус. Щи таха лап тухарса па Алёна Васильевна яӆпа рупата канштыя питас. Имоӆты порайн Суматвош районан «Комплексный центр обслуживания населения» тахайн 2020-мет таӆ вуш эӆты рупата мощатас, щита ищиты ох ӆуңатты нэңа рупитас.
Еша уӆ па куща нэңа рупиттыя вуса. «Щи вушат эӆты манэма мет мосты па умащ рупата верат уйтсам. Щиканща тата мосванан веӆщи кущая йисам», — Алёна Леонова ястас.
Тамхатӆ йис пормасат шавиты хотан 22 хатнэху рупитаӆ. Щи тумпийн Саранпауль па Лэв ёхан музей хотңан ищи районан йис пормасат ӆаваӆты хот хоща ханшман тайӆайт.
Суматвош районан тамащ йис пормасат шавиты хот Советской лащ порайн 1979-мет таӆн туп пуншса. Мет оӆаң куща нэңа щи йисн Наталья Елизаровна Филиппович ус. Щи нэ катра Суматвошаң райком КПСС хоща рупитас. Там хатӆат вуш унты музей хотан уӆты хоятат ханты, охаль, саран па рущ мират йис пормасат хоӆыева ияха акатӆат, щитат онтасн сыр-сыр вантопсайт умща па хорасаңа кашң пуш ӆэщатӆайт.
Музей мет оӆңа катрая ювам паварт хотан ус. Юхат, 2003-мет таӆн, яӆап па ӆащкам кирпащ эӆты омпсам хота касӆаптаса. Щи вер ураңан пормасаң вантопсайт ям верты па аршак хоят вантты ёхтыӆыты верытаӆ.
Йис пормасат тайты хот кат вантопсайңан вантты хот ятңан тайӆ, щит: «Там хатӆатан уӆты верӆув, маты отӆув йис пораятан тыйсат» па «Шоши ёхӆув хуӆ-вой веӆпасӆаты па вуӆы ӆаваӆты щират, ӆый катра порайн па там кутан уӆты верӆаӆ, муйсыр ӆуңхата щи хоятат эваӆтсат па уӆты щирэӆан пойкщасат». Щи тумпийн, Суматвошаң хоятат кеша кашң таӆ тамащ вантопсайт верыӆыӆайт, щит: «Ӆый мет оӆаңан усат» (мув иӆпи тащ каншты ёх эӆты), «Суматвош мувев иӆпийн мощатам йис пормасат», «Муват-йиңкат па хатнэху», «Шоши мират ӆуңха эваӆты верат», «Муй щирн Суматвош тыйс?», «Муйсыр хоятат Суматвоша юрн китсайт?», «Муй щирн катра аӆ хоятат там Суматвошеван усат?», «Хоты Советской лащ таӆатан хоятат уӆтыя верытсат?».
Щиты йис пормасат шавиты хотан тамхатӆ хоӆыена уӆӆат па рупитӆат.
Владимир Енов ханшам потар
Авторы
Лух Авт
Темы