Лух Авт
Йис верат еӆӆы туты ёх актащисат
Пулӊаватан Овс мув шоши мир верат туты департамента ӆоӊам ёх община тайты мохет па туса вератты, шоши уӆапса мира этаӆтаты хоятат пиӆан яха актащисат. Ӆув кутӆаӆан потарсат, хой муй вераӆ. Кущайт ястасат па этаӆтасат, муй нётап щи кеша ёша пайтты рахаӆ. Щимащ уйтантопсайт кашӊ таӆ ӆэщатыӆайт.
Оӆаӊан ӆув МАУ «Салехардской центр молодёжи» хотан еӊта пасан суран опсыӆысат. Округ куща ӆаӊкар ху Сергей Климентьев па «Ямал — потомкам!» Ассоциация куща Эдуард Яунгад оӆаӊ ясаӊ тусӊан, хоты шоши мир уӆапса округан шавиӆа, муй онтас щи кеша общинайт па предпринимателят верӆат.
Щаӆта ёхтам хоятат хуӆантсат па нёхты хорат хуват вантсат, Ямалан бизнес туты ураӊан, муй хорпи ох нётап уӆ. Ёра вер туты хоятат ураӊан, ванты арсыр нётты щир — субсидияйт, грантат, льготайт.
Районат эӆты ёхтыӆыйм хоятат ясаӊ тусат, хой муй вераӆ, хоты шоши мир уӆапса, йис верат еӆӆы туты ураӊан рупитаӆ. Хой вуӆы хот тайӆ, щи мойӊ хоятат вохиӆыйӆ. Кимет па туса моӆты вераӆ, энамты няврэмат утаӆтаӆ.
Ӆорвош район эӆты Галина Лобанова ёхтыӆыйс, еӊта пасан суран потартас: «Ма Касам-Нёӆ эӆты ёхатсам. Куртэм лепан нюки хот тайӆам. Хотэман шоши хоятат уӆапсайн уӆты щира муй иса тайӆам. Ма нуй, щашкан, вуӆы сох эӆты вераттэм тумпийн, хуӆ сох эӆты пормасат ёнтӆам. Емаӊ хатӆатан, мастер-классатан иса этаӆтаӆам, хоты щимащ пормасат верты. Ванты, ханты хоятӆув щи йис вер ант ат ёрэмаӆэӆ».
Етна пелка мойӊ мохет Пулӊават лепан уӆты вуӆы хотата яӊхсат. Этаӆтасат, хой муй хошаӆ верты, ёнтассат, тынщаӊан сув ёваӆмисат, нёӆ ёваӆсат, шоши мир ӆэтот ӆэщатсат, няр хуӆ версат, каврам шай кавартсат. Щи хатӆ ёхтыӆыйм хоят кашӊ ӆув урӊаӆан, вераӆ туты, яӆап щир артаӆас, хоты мосты вераӆ еӆӆы туты.
Валентина Рохтымова ханшам потар
Авторы
Лух Авт
Темы