Лух Авт
Югра мув самаңа тайӆэм
Щиты хунты Югра мувев эӆты воӆаң мари мир учёной потартас, филологической наукайт доктор, профессор ху Юрий Владимирович Андуганов. Ӆув ущ тыӆащ 6-мет хатаӆан 1949-мет таӆн сэма питмаӆ, туп нэпека ханшса — 23-мет хатаӆан. 56 таӆа ювмаӆн ущ тыӆащ 6-мет хатаӆан 2005-мет таӆн машинайн манман антома йис.
Там ванан муң редакцияева ӆув эвеӆ Марианна Юрьевна Андуганова мойңа ёхтыӆыйс. Муң ӆув эӆтэӆ Ю.В. Андуганов уӆапса эӆты иньщассув. Оша йис, Юрий Владимирович Башкирской АССР Калстасинской район Редькино куртан сэма питас. Тата ванан Танып ёхан овӆ. «Ӆув щи ёхан хонаңан каращ рэп эӆты Белая ёхан вантты мосман тайс. Ёмвошн уӆмаӆн ӆув Шапша курта яңхиӆыйс па щита ищи каращ рэп эӆты Ас пеӆа вантыӆыйс», — М.Ю. Андуганова ястас.
Ӆув антеӆ-ащеӆ Редькино куртаң ашкуӆайн няврэмат утаӆтасңан. Юра похие айтэӆн мари, хатань па рущ ясңат яма тайс. Ёӆн кутэӆн туп мари ясаңан потартсат. Юра Езвика ун щащеӆ пиӆн вонщамотат, толхат акатман унта яңхиӆыйс. Щи порайн щащеӆ эӆты йис потрат, монщат, арат хуӆантас. Хоттэӆ ёхӆаӆ нарассат, хорамаңа арысат, етнхотат альсат. Щишн Юрий Андуганов Арлан куртан 10 класс етшаптомаӆ юпийн мет сыры арыты вера утаӆтыты номас понас. «Мари мув воӆаң Йошкар-Ола воша ёхатмаӆн музучилищайн экзаменат маты еӆпийн ар мороженой от ӆэс, щишн арыты иса ант верытас. Вош хуват шушӆ, ещаӆт ӆухсаӆ Борис Шаймиев йиӆ, инщасӆ: «Наң хоты йисан?», ёхӆы Юра ӆувеӆа ястаӆ, щикуш арыты вера утаӆтыты ӆаңхас, туп турсыйӆ ушас. Щи порайн Борис ястас, Марийской пединститута ёхта!», — Марианна потартас.
Юрий Андуганов щита экзаменат яма мас, няврэмат рущ, мари ясаңңана па литературая утаӆтаты хуя йис. Пединститутн Маргарита Александровна Исаева пиӆн уйтантыйс. Айӆат катңан мой версаңан. 1971-мет таӆн нэпекаңа ювман Мари мув Старокрещено куртаң ашкуӆая рупитты китсайңан. «Ӆын тата пиращ Анна ими хотн усңан. Тата ма сэма щи питсам, щишн марийской Анна — Марианна нэмн масайм», — Марианна Юрьевна ястас.
Юрий Андуганов еӆӆы Петропавловск-Камчатской вошн армияйн служитас. Хунты Воӆаң Ляль порайн тата ӆув ащеӆ тохӆаң хопн яңхман служитас.
1973-1976-мет таӆатн Ю.В. Андуганов Эстония мув Тартуской университет хоща аспирантурайн утаӆтыйс, ӆув научной кущая воӆаң финно-угровед ху Пауль Аристэ ус. 1976-мет таӆ вуш эӆты Марийской госуниверситет хоща рупитты оӆңитас. «Щикуш учёной хуя йис, туп уӆапсэӆ хуват марийской свирельн нарасас па арыйс. Университет хоща айӆат ёх пиӆн «Рия-Рия» мари арат арыты таха ӆэщатас. Ӆыв муң мувев па па хон пелак муват хуват арыман яңхсат», — М.Ю. Андуганов ястаӆ.
Ӆув 1977-мет таӆн «Сложные слова в марийском языке» нэмпи диссертацияйӆ сайӆас. 1992-мет таӆн Тарту вошаң университет хоща докторантура етшаптас. Щи таӆн «Микросинтаксис марийского языка в историческом освещении» докторской диссертация хоӆамтас па филологической наукайт доктора йис. 2002-мет таӆ унты МарГУ хоща айӆат ёх утаӆтаман рупитас, диссертация нэпекат ханшты нётас. Щи таӆн Юрий Владимирович Андуганов Ёмвоша 2001-мет таӆн пуншам Югорской государственной университета рупитты вохса. Щикуш ӆув тата туп хуӆам таӆ рупитас, туп ар ям вер верас. Россия мувев утаӆтаты па наука верат туты министерствая пищмайт ханшас па вохас, ӆуӆн ЮГУ хоща шоши мир йис уӆапсая, литературая, ханты па охаль ясаңңана утаӆтаты ёх ат ӆэщатсайт, щи тумпийн аспирантура ат пуншса. Ӆув юрӆ онтасн щи верат иса тыйсат!
Юрий Владимирович Андуганов уӆапсэӆ хуват рут мари ясңаӆ ӆэрамтас, ар па хон пелак ясңат яма тайс, 130 моӆтас научной нэпек ханшас, ар хоята ун научной нэпекат ханшты нётас. Ӆув яма па вещката айӆат ёх утаӆтаты па наука щирн рупитмаӆн арсыр воӆаң нэмат па ишакты нэпекат хоӆамтас.
Югра мув шоши мирн ӆув ун пумащипа ясаңан ястаӆа па веккеша нумман тайты питӆа. Ӆув утаӆтам ёхӆаӆ Юрий Андуганов воӆаң верат еӆӆы туӆат.
Людмила Шульгина ханшам потар
Авторы
Лух Авт
Темы