Лух Авт
Югра муван ай хопан касӆат
Ущ тыӆащ 29-30-мет хатӆатан Югра муван Байбалаковской посаӆ хоща «Югорские обласы» касапса манты питаӆ. Хуӆамсоткем хоят Югра губернатор Кубок ёша паятты ураңан там касапсая пиӆтащаӆ.
Мет ямшак Россия мув па па хон пелак эӆты ёхаттты ёх ай хопан касӆат. Муй хорпи верат па хоты сахат щита манты питӆат, каматса ясаң АУ «ЮграМегаСпорт» куща Артём Сухорущенко ястас: «Тамащ касапса муң антом оӆаң пуш верыӆыӆув, там еӆпийн Шапша куртан маныӆыйс. Аратаӆ мира там касапса сама рахас. Щишан номас понтсув па верты. Щи веран па мир хоятат там муван уӆты шоши ёх уӆапса эӆты аршак уятты питӆат. Антом кашң хоят верытаӆ ай хопан яңхты, тата мосаӆ сора ӆоваӆты па оӆңа ёхатты. Ӆавартшак питаӆ.
Этнофестиваль хорамаң муван верыӆыӆув. Таӆаң вош ӆонщиӆыӆув. Ёхтыӆыты хоятат торахӆаӆ сыстам унши юх эпаӆан тэкаптаӆӆаӆ, ямас щутщаӆат, юр акмаӆӆат. Ай хопан касты тумпийн, Югра мув ӆоватан уӆты араң-якаң хоятат ёхатӆат, ӆув мойң хоятата каш этаӆтаӆат. Ӆэтот каварты хоятат шоши мир хоятӆув ӆэвпасат пасана омпсыӆыӆат, мир ӆапатӆат.
Масс-старт 500 метра хуватан манты питаӆ. Кимет — йи пан пелак эӆты па пелка ай хопан ӆойман манӆат. Хуӆмет — хун хопан 2-3 хоят ӆоваӆман манаӆ.
Там касапсая 15 па хон мув пиӆтащас: Алжир, Белоруссия, Иран, Израиль, Казахстан, Камерун, Киргизия, Китай, Марокко, Сирия, Тунис, Турция, Туркменистан, Уганда, Узбекистан. Щаӆта муң Россия хоятӆув.
Там пуш ашкуӆа етшам 500 няврэм там мув харан акатӆув. 29-мет хатаӆан ӆув ураңӆаӆан каш верӆув. Хойтат «Алые паруса» хоща яңхӆат, муң няврэмӆув ураңан па «Югорсие обласа» емаң хатӆ верӆув.
Хой верытаӆ, хоӆ там Хоттэӆ хоятат таӆан, ёхтыӆыяты, каш вантаты».
Югра муван воӆаң емаң хатӆ манты юпийн, муң «Ӆух Авт» газетайн щит эӆты ханшӆув, айкеӆ верӆув. Мосаң, матты ханты хоятэв, моӆты порайн, ищи хорпи касапса Ямал муван верты ӆаңхаты питӆа.
Аллина Тоярова ханшам потар
Авторы
Лух Авт
Темы