Лух Авт
Юх па ӆов эваӆт верты пормасат
Йис тэӆна хантэт юх па ӆов эваӆт каман сот пормас верта хассат. Тамхатӆ щи вер тус ясаӊ нэӊхэтна алӊищ туӆа. Юх эваӆт анат, путат, хат ӆыпина тайты пормасат, йи корӆуӊ такӆы охлат, хопат верӆат, хат аматӆат, нявремӆаӆ эӆты енттытат па нарасъюхат верта хасӆат. Щи ораӊна сумат, нахар юх, наӊк па хоп юх тайӆат.
Ханты тус ясаӊ нэӊхэт верты пормасат кутна мет такан итта лотӆайт па тайӆат: хуванат, ӆыйт, сай анат па нялет.
Юх пиӆна ропытта сэӊк щёкат, пормас верты юх алаӊ эваӆт акатта масӆ, ямас кастата. Ан нясах юх эваӆт ки эватӆа, сарта питтаӆ порайна локки таханӆ. Туӊ па хорам ан эттаӆ ораӊна ям юх пирыӆа, хуван эватты юпина война нэрӆа, щи юпина ӆытыт понта рахал.
Карра лапка енттыт антам олмаӆ порайна, енттыт нявремӆаӆ ораӊна щирэӆна версат. Топ тамхатӆ маса ар пелак енттыт ярэмасайт. Васъёханов хантэт хонты кепа шахмат хорпи енттыт тайсат, нэмаӆ «Топись» ос, муӊ хощев ӆув ант ёхтас. Тамхатӆ холна вутн касӆыман яӊхты нявремат хоща ёхал сыяӆата рахал.
Юх па тонты эваӆт холна нявремат хойты антпат верӆайт. Щиты няврем хояпсы йис тэӆна ӆувеӆ ямас эттасӆы, так ищкетна ор хатна няврем ямас иӆ ёварман хощ ант патӆа, щитна итта ты маса вутн касӆыман антап мет ям верапса.
Хантэт анта топ юх эваӆт эватты вер ванна тайсат, ӆов эваӆт па версат. Каӆаӊ па кураӊ вай аӊтат верты алаӊна ямас каварӆайт, топ щи юпина каман сот пормас эватта рахал. Щиты Овс мув нэӊхэт олты хуват мув хорас пиӆна йи ӆыӆ сув ӆаӆман олтэӆ хорпи, тамхатӆ маса щирӆаӆ-пищӆаӆ савиӆӆаӆ.
Вера Лонгортова хансам потар
Авторы
Лух Авт
Темы