Лух Авт
Юкан вуӆэт тайты ху айкеӆат верас
Кашӊ таӆ Русскинской куртан Сорханӆ районан Вуӆэӊ, хуӆ па вой веӆпасӆаты ёх емаӊ хатӆ маныӆыйӆ. Ма па щи питыӆысам. Йи хатаӆн ма рупатаем щирн арсыр хоятат пиӆн уйтантысам па сыр-сыр айкеӆат ӆый уӆты-хоӆты щирӆаӆ эӆты япсыена оша версам.
Щиты тыеӆ-тохеӆ яӊхман, манэм уйттыя хатнэху пиӆн ияха уйтантсаман па ӆувеӆ потрэматыя хущсэм, туӊа-щира уӆапса верӆаӆ эӆты щаӆта инщассэм.
– Ма Станислав Семёнович Сопочин. Там нови турма хуӆ-вой веӆпасӆаты ёхат хоттэӆ хоща ёхатсам. Катра шеӊк самаӊа унт пелакн арсыр вой веӆтыя яӊхиӆысам па Туром ёханэвн уӆты сыр-сыр хуӆ па веӆпасӆасам.
Там йисатн, ванта, хуӆ па вой иса шимӆашак йис. Щимащ вер ураӊан ин унт куртэмн уӆӆам па ма юканэма тайты вуӆыӆам пиӆан волкемаӆам.
– Станислав Семёнович, муйсыр рут щирн ӆуӊтасты тахайн наӊ иса хоттэӆ ёхӆан пиӆн тамхатӆ уӆӆан па муй арат юкан вуӆы тайӆан?
– Тамхатӆ ӆапатмет рут щирн ӆуӊтасты мувемн унт куртэмн хоттэӆ хоятӆам пиӆн уӆӆам. Муӊ унт куртэв Туром ёхан хуватн иса нохӆы пеӆа омасӆ. Щи онтасн муӊева еша кеншак, ванта, еша хуваншак мув иӆпи тащ каншты рущ ёх эӆты ин вуӆыӆув тайӆув. Там ёхи хащам кутатн, аӆпа, 80-кем вуӆы лэӊкие ма хощаема аратэӆн уӆ. Щаӆта ин щиты ястатыя вутщиӆам, хоты кашӊ яӆпа ёхатты таӆн муӊева иса ӆавартаӊа юкан вуӆэт ӆаваӆтыя па еӆӆы тайты. Ин, ванта, нёта энамты тахайӆув, хоты вуӆыӆув яӊхӆат па ӆэтот каншӆат, кашӊ пуш шимӆа па аяшак йиӆат. Ма кушкепа ямкем ун унт щуӊан таха тайӆам, хота вуӆэт ӆапаттыя верытӆам. Итухаӆ ханты ёхӆув иса щимащ тахайт такӆы тамхатӆ хащсат.
– Муй ураӊан щимащ вер рут мувн па унт куртатн уӆтыя хантэт хоща питас?
– Муӊ рут щирн тайты мувӆув кератман тамхатӆ мув иӆпи тащ каншты рущ ёх уӆӆат па рупитӆат. Кашӊ таӆ сыс ӆый муӊ хощаев вана ёхатӆат. Щиты ин Тэвлинско-Когалымской таха йи пелак эӆты па Тяновской таха кимет пелак эӆты «Сургутнефтегаз» мув иӆпи тащ каншты ёх муӊ хощаева еша уӆты щи ёхатӆат. Муӊ щи пораятн хоӆта пеӆа манӆув? Па рут мувие муӊ ант тайӆув!
– Станислав Семёнович, муй арат няврэм наӊ тайӆан, аӆпа, ӆый уна йисат?
– Мин имисакӊан няврэм иса ант тайсаман. Щи юкана яйм шуӊат хуӆам пох ийимем пиӆн энмаӆӆаман. Катӊан там таӆ сысан хоӆна ашкуӆайн утаӆтыӆӊан. Ун пеӆа яйӆ специальной военной операцияя манас.
– Наӊ щирэнан, тамащ Вуӆэӊ, хуӆ па вой веӆпасӆаты ёхӆув емаӊ хатӆат яма муй вевтама там ёхи хащам таӆатн Русскинской куртан вертыя питсайт?
– Ма нумастэман, тамащ емаӊ хатӆат мет яма, хорамаӊа ёхи хащам пораятн ӆэщаттыя питсайт. Катра ма там емаӊ хатӆата ёхтыӆысам па сыр-сыр касты верата яӊхсам па итухаӆ щёсатн оӆаӊ тахаят па хоӆамтысам. Ин, ванта-са, еша уншака йисам па аӆ щиты рут ёхӆам пиӆн уйтантытыя тый яӊхӆам. Ям вер, хоты Вуӆэӊ, хуӆ па вой веӆпасӆаты ёхӆув емаӊ хатӆэв еӆӆы постаӆа!
Владимир Енов ханшам потар
Авторы
Лух Авт
Темы