Лух Авт
«ЮнАрктика» проектан нох питам няврэмат
Округеван «ЮнАрктика» региональной проект итогат ястасайт. Таӆ сыс нийӆмет классатан утаӆтыты хуӆамсот пеӆа хольмаң йи команда касас. Хутхосьяң нох питас. Сит ветсот пеӆа няӆъяң йи няврэм.
«Арктос» няӆмет ашкуӆа Муравленко вош эӆты оӆаң тахая этас. «Сила Севера» Губкинской вош Ярослав Василенко нэмпи ашкуӆа кимет места вусат. Приуральской район Охсар курт «Звёзды Ямала» команда хуӆмет тахая пирыса.
Кашң нох питам класс дипломан юкантса па Москва, Хон Петра, Тула, Волгоград, Тверь, Ржев, Орёл, Курск вошата сютсяты тутӆыӆайт.
Охсар курт няврэмат эӆты Приуральской район Развитие Системы Образования ресурсно-методической центр куся нэ Олеся Леонидовна Овчарова потар верас: «Симась касапсайн няврэмӆув там пуш мохты район па округ хуват нийӆмет пуш кассат. Охсар, Белоярск, Катравош па Харсоим куртат эӆты яртъяң класс-команда ус. Охсар курт эвет па похат район хуват иса оӆаң тахая этӆысат. Округеван — оӆаңмет, кимет, хуӆмет местайт вуйӆысат.
Си еӆпи таӆатан ветхосьяңмет тахайт кутан усат. Там таӆан ун вошаң па куртаң 231 команда хося хуӆмет тахая этсат. Сит шеңк ям.
Няврэмата, аңкиӆаӆа-асиӆаӆа, няврэмат классной хоятэӆа Анатолий Николаевич Рыбакова, утаӆтаты хоятӆаӆа ун пумасипа ястаты утсиӆам. Яха ун рупата версат. Сус каникулайн няврэмат ястаӆайт, муй хон мув вошата сютсяты манӆат».
Альбина Тырлина ханшам потар
Авторы
Лух Авт
Темы