Лух Авт
Каӆаӊ ёх вер туты нэ
Щи ӆаварт рупата нэӊат ищи туӆат. Каӆаӊ тащ хотан нэ ки антом, воӆӆы ӆаварт питаӆ — ёх уча хув яӊхты ант верытӆат. Там потар шупн Олеся Сязи эӆты ясаӊ туӆув.
Туняӆ таӆ щёхар тыӆащ оӆаӊ хатӆ эӆты каӆаӊ тащатан рупитты нэӊат ураӊна яӆап нэм ӆэщатса — работник кочевого жилища. Щи щирн рупитты нэпека иса ханшман уӆӆа, муй нэӊата верты мосаӆ.
Олеся Юрьевна Сязи рупитты нэпекаӆ хоща ханшман уӆӆа — оленевод третьего разряда. Ищиты ин кашӊ рупитты нэ нэпекӆаӆн ханшман уӆӆа, хой сельхозпредприятияйт хоща рупитаӆ. Щишн нумасты рахаӆ ӆув ищи каӆаӊ тащ воштыты яӊхӆат па ат ӆаваӆӆат. Анта, ӆув хоты вер, уӆапса вер иса ӆэщатӆат. Ийикеӆ тащан яӊхтаӆ эӆты, ӆаварт рупата иса нэ ёшатн уӆ.
Сэма питас Олеся Юрьевна Ас потты тыӆащ 29-мет хатӆ 1988-мет таӆн Охсарка вош Кев сыӆ районан каӆаӊ ёх семьяян. Сишн каӆаӊ ёх вер айтэӆн торӆы уйтӆаӆӆы. Хун пора ёхтас, ашкуӆая яӊхас. Ӆувеӆ етшам юпина мохты ёхӆы, антеӆ-ащеӆ хоща манас па утӆам верӆ еӆӆы туты питас. Имоӆтыена ӆувеӆ уртыты Пётр Антонович Сязи ёхтас. Щиты Олеся Ӆорвош район пеӆа касӆас па инты унты щита ийикеӆ пиӆан уӆӆатан. Ас нопатты (суюв омасты) тыӆащ 2008-мет таӆ эӆты ӆув ООО «Сельскохозяйственное предприятие «Горковское» хоща рупитаӆ.
Рупатаяӆн куща ёх ӆув эӆтэӆ иса ям ясаӊ ястаӆат. Ийикеӆ каӆаӊ тащ хоща кущая уӆ. Катӊан няӆ няврэм тайӆатан па энмаӆӆатан: хуӆам похие па эвие. Туняӆ, Ӆорвош район каӆаӊ ёх емаӊ хатаӆна ӆув «чумовой капитал» ёша паватсаӊан. Щимащ ур хот пормасӆаӆ пиӆн ӆувиӆаӆ мойӆаса эвиеӆ сэма питам ураӊна.
Каркам нэӊев кашӊ пуш емаӊ хатӆатн касты ӆойӆыяӆ па каӆаӊ ухаӆан ӆэӆамтыяӆ. Щиты, каматса таӆ хащамн, Питӆор вошн ӆув ухаӆн навраӆтыман оӆаӊ места шитыӆыяс. Щи тумпина ар ишканщап нэпекатн мойӆаптаман уӆ: каматса Благодарность районной Дума Ӆорвош район эӆты, щаӆта Благодарность Ӆорвош район куща мийӆымаӆ па Благодарность АПК ЯНАО Департамент эӆты ищи ёхтыӆымаӆ. Тампуш па ӆув Почётной грамотайн АПК ЯНАО Департаментан юкантса.
Ат па еӆӆы, ищи там иты, шоши хоятӆув, вуратӆат. Ат тумтака уӆӆат, ханты йис уӆапса па ясаӊ еӆӆы туӆат!
Иван Сандрин ханшам потар
Авторы
Лух Авт
Темы