Лух Авт
Каӆаӊаӊ нэӊхэт емаӊ хатӆна хольмаӊ ор хат аматӆа
Тампус Пулӊаватна каӆаӊаӊ нэӊхэт емаӊ хатӆна мет ар ор хат аматӆа. Аратэӆна хольмаӊ хат ропытта питаӆ. Щи томпына Дмитрий Губерниев па ёхатаӆ.
«Касӊ таӆ, каӆаӊаӊ нэӊхэт емаӊ хатӆна воӆаӊ касты хар, щит каӆаӊ охлатна навраӆтыты вер, ма щита потар сый верты пормас хуват потремита питӆам, матты каӆаӊаӊ охал номер мет ямас манаӆ, хой ялтасак хыщаӆ, аса ма лавта питӆам», — «Матч ТВ» телеканал журналист Дмитрий Губерниев лавас.
Алаӊ таха сытты нэӊхэт лонщхопатна маӆайт, ялтасак хыщтытат па ох майӆапсы сытӆат», — Ямал мув губернатор пресс-служба хоща хансса.
Пулӊаватна каӆаӊаӊ нэӊхэт емаӊ хатӆ ай кер тыӆащ 21 па 22-мет хатӆӊанна Полябта ёхан сыӆна манта питаӆ. Щита камантсы хар ӆэщатӆа: касты ях, тынэсты па гастрофестиваль верты ораӊна. Майӊ нэӊхэт ораӊна па хольмаӊ ор хат сохла.
Тампус мет алаӊ пус йис порайна лялесман тайм пормасаӊ ор хат аматӆа, щита аӆты кесэт, наганат, посканат, эӆ сайӆаман тайм корты лапсат па хат ӆыпи пормасат вантта рахал. Кимет ор хатна па шимӆаӊ мир сохатна хор верта рахта питаӆ. Аканят эттыды ораӊна па выставочной хат ропытта питаӆ. Леккарат ораӊна щиреӆ хат, хой леккар вер сахат инщисты вер ки тайӆ, щита лоӊемита рахаӆ. Емаӊ хатӆна холна холам гостиница-ор хат ропытта питаӆ. Мув вантман яӊхты ях ох сахат щита хойта веритта питӆат.
Гастрофестиваль верты ораӊна шеф-повар па телеведущий Александр Белькович ёхатӆ. Тампус кавартам каӆаӊ нёха рекорд аматты вер ол. Майӆата ёхатты нэӊхэт ораӊна хуӆ хасэӊк кавартӆа, патам хуӆ па нёха нёхарӆа, щи юпина тут хар сыӆна па сай еньщӆат.
Вера Лонгортова хансам потар
Авторы
Лух Авт
Темы