Лух Авт
Канащ пухӆаң ёх уӆапса
Каматсы таӆ сайна Канащ пухаӆна муваң нэңхы Никон Николаевич Куйбин пиӆна яха ёхтыӆысам, тамащ хансапсы тывас. Никон Николаевич ӆув яра мув йир ясңаӆна потраӆ туӆӆы.
Рутам эват
«Омэм Пухар пухаӆ (Зелёный Яр) эват оӆам ханты-орның. Йирэӆ ур ях ос. Ляль оӆаңна Ямальский района каӆаңӆаӆ вурты яхна нох вуты питсаят. Ики каӆаңӆаӆ йикӆаӆ эӆты ортӆаӆы.
Касаң йикаӆ ӆув каӆаң сукӆаӆ вуӆӆы. Йи йикаӆ Надымский района хонтаӆ. Кимет йикаӆ Пул ёхан пеӆа китмаӆ. Щита ханты ның вуӆ. Щит омэв. Ӆув яра, вуӆ ики, муваӆна хыщмаӆ. Вурты ёхна ант ат кансӆа.
Канащ пухӆаң ёх каӆаң тайты верат эват
1970-мет таӆат томпина Канащ пухаӆна каматсы хот туп хыщиӆыяс. Мур ӆуңан хуӆ веӆӆат. Суссы йиӆ, Ас потты оӆаңна пухӆаң ёх каӆаңӆаӆ хоща кевна манӆат. Мохыӆаӆна щита савиӆаят. Ӆуң хотӆаӆ паятӆаӆаӆ, ӆэщатӆаӆаӆ.
Ас потты юпина ты вунсӆат. Юңк ухаӆ пуляң тата Асна хоӆап тайӆат. Айнайна совхоз тащат манӆат. Щи юпина таӆ оӆты Асаняӆ ӆоңаӆна касаӆӆат, Паӆвос ӆыпетна.
Асаняӆ Паӆвос пеӆа оӆ. Пулңават вос эваӆт ныӆа. Таӆ хуват щита оӆӆат. Ӆув сасы каӆаңӆаӆ пиӆна. Товина, совхоз тащат нык йиты оӆаңна нык йиӆат. Тата каӆаң сукӆаӆ савиӆӆаӆ.
Кев пеӆа касаӆты порайна хой рутӆаӆ эӆты каӆаң сукӆаӆ савиты маӆӆаӆ. Тайшин опаращпит ос. Щит каӆаңат пиӆна каӆаң сукӆаӆ касӆаптаӆӆаӆ. Нётӆэӆ ӆувеӆ. Тута Кевна, хата омтаӆтыты тахайӆаӆ оӆӆат, щи ёхтаптатэӆ моса. Щиӆта парта йиӆат.
Муң ащев па яңхыӆыяс мохыӆаӆ пиӆна. Нётты. Муң хоты, яйӆам-апщиӆам пиӆан, каӆаңна ант яңхыӆысув. Каӆаңӆув осат. Ащев манӆ. Щита щи яңхыӆыяс.
Герман Наков хансам потар
Авторы
Лух Авт
Темы