Лух Авт
Канащ пухӆаӊ ёх уӆапса
Там потар вет таӆ сайн хансыӆысэм. Никон Николаевич Куйбин аратаӆ миран яма уйтӆа. Ӆув потартыйм потарӆаӆ еӆпи этам газетаята поныӆысӆув. Хоятатан ӆуӊтыӆысаят, ям ясаӊан ястыӆысаят.
Щирэмна веӆпасӆаты питсам
– 1968-мет таӆ. Хутхощъюӊ таӆ усам. Ма аӆаӊ рупитты питсам.
Омэм посаӆас. Омэм посаӆамаӆна манэм хутхощъюӊ таӆ ос. Ащем пиӆна иӆэм таӆ ма рупитсам. Щи оӆаӊна хоты яӊхыӆыӆам, аӆ ӆэлиӆаям, моса нётӆам тоӊха. Харсоямна унӆтысам. Юхат рупитты питсам. Ащем хув ант ус, посаӆас.
Щи порайна щирувна хыщсув. Вуӆат юканы ма хыщсам. Ма эваӆтэм вуӆ яй тайсам, яйм посаӆас. Хопна манмеӆ тахайна йиӊкна посаӆас. Век ущиӆыям антам.
Еӆащ унӆтыта ма вохыӆыӆаям па ант ӆытсам. Юхат юраӊи ювмем юпина вохыӆыӆаям, ма ант ӆытсам. Манэм сук ус.
– Итта наӊ ант рупитӆан, наӊен Асэн такӆы касӆы па щукат ант уӆ?
– Щукатсак щи. Хоты верӆа? Итта ӆавты сук. Аӆаӊсахатна вет щёсна ма нох верӆаӆам, нык манӆам, Ас сыӆна сусыӆыӆам. Там нэӊхы манмаӆ, том нэӊхы манмаӆ.
Хопам вантӆэм, няврэмӆам ант ки мантсат, ма яра мохты манӆам. Щиӆта нык манӆам, няврэмӆам манмеӆ ки, хопевна. Кат йикам. Итӆ Слава, итӆ Тимофей.
– Ныӊ тайӆаӊан?
– Вуӆ атӆ, Славайӆ ныӊаӆ оӆ. Ай атэм итта унӆтыта манас. Ӆув зооветехникумна унӆтыяӆ.
Там йис хуӆ веӆпасӆаты вер эват
– Наӊ щирэнна номас вусан ноптаӆтыты вер эват воӆыттыйи? Мола ураӊна наӊ воӆысан?
– Там йисна йина щукаты йис хуӆ веӆты уӆапса. Ханты ясаӊна ӆавман щи ханты хуӆ мохсаӊ, щёхар сымӆамас, вунс веӆты аратыта питса. Катра щи хуӆат веӆты рахам порайна кас уӆта.
Путы хуӆ антам кепа: паниӊен молаен антам кепа, том хуӆат веӆты пора хыщӆ. «Настроение» июӆты уӆ. Итта па том хуӆ ант веӆты, ущ ёхтас, щи, хуӆан веӆты ант рахӆ. Ант ущӆат мола верты?! Паниӊ сук еса веӆсат, Асна па хуӆ антам.
Хой пасак тахайна манӆ рыбнадзор ӆаваӆ: «Наӊен ант рахаӆ тата веӆты. Там наӊ «местаен» ант уӆ. Мана па тахайна. Щиты сахат, манэмна сэӊк щукат хорпи.
Ма хоӆ хоты хув манты ант верытӆам. Восна яӊхты умащ ус. Катрасак яӊхыӆыӆам. Итта анта. Пухаӆна век усам, аса ма нэӊхыӆам. Ким этӆам: няврэмат уӆӆат, хой пиӆна аса потарӆан, мола. Тюменьна хотна масаям, кат пус яӊхсам па щи, омасаӆ. Тата вохсам, ант масаям.
Мола такаӆыйи ӆэпаӆтыты нэӊху… Хата ма манӆам, манэмна июӆты хоӆ манӆам. ма «мешаятӆам». Ма «чувствуетӆэм» манэм щиты. Ма щиты нумасӆам. Манэм тухаӆ порайна йэӆэм. Ёхатӆам па нэмоса ант хастэм хорпи. Аса рупитӆат.
Ӆавиӆыӆам мохыӆам пеӆа: «Па йисам, ма тата «мешаетӆам». Щи кут нэӊхы ӆаваӆ: «Юва, юва муӊ хощаев».
Метсам. Итта мола юӊкем тонна веӆты ӆуӊ манман.
Муӊ катра сэӊк артан веӆлиӆув. Хуӆам таӆ хоӆна антам сыс пятилетний план там Асна тукаптаӆэв!
Ӆар ант тайӆув. Муӊ ряпушка артан веӆыӆыӆув. Яӊхыӆысув Белоярскна. О-о-о! Щи порайна брандвахтайна 1 октября ӆэӆӆув бригадайна. Ниӆ-веткем нэӊ&$! таӆта вуӆам, манӆув ряпушка веӆты. Ёханаӆ потӆа, мохты оматӆаӆув.
Щи рюжаят оматӆаӆув. Щи арат ряпушка! Хатаӆ кутапна ёхатӆаӆув, хатаӆ кутап юпина па тэӆ ӆоӊты 100 — 120 тоннайн. Ям порайт щи усат, хуӆаӊат.
Герман Наков хансам потар
Авторы
Лух Авт
Темы