Лух Авт
Касапса сохныӆыйс, номасан хащиӆыйс
Сютсяты хатӆатан Пулңават вошан хуӆмет пуш «Разбуди Ямал» касапса верса. Там пуш няӆсот моӆтас хоят тохи ханшӆтантыйс па няӆ дистанцияйн хухатӆыйс.
Ай няврэмиет таӆ моӆтас кат таӆ унты, хой веӆси шушты питсат, па ун хоятат хухаӆсат. Си тумпийн, нэңат каблукаң сопекан аӆ нёхамтысат, матты ки няркурты. Ун хоятат, энамты ёх па ашкуӆайн утаӆтыты эвет па похат йи па вет километра хухаӆман сора манапсат.
Кашң таӆ си касапсая округ ай куртат па вошат эӆты хоятат ёхтыӆыӆат. Таӆаң семьяйт, коллективат усат.
Нэлли Куртямова каматса ясаң ястас: «Ма Овкурт эӆты. Ин Пулңават вошан уӆӆам. «Салехардэнерго» хося рупитӆам. Хун симась касапсайт верӆайт, ма кашң пуш касӆам. Таӆан ма ӆохан хухатӆыӆам. Кат ӆапат хасяс, хоты Новый Уренгой вошан «Зелёный марафон» Сбербанк верам касапсая яңхсам. Яң километра хухатӆысам, хуӆмет тахая этсам. Там касапсайн кимет пуш касӆам. Вет километра хухаӆсам. Нийӆмет тахая питсам. Хасям таӆан ветмет усам.
Там пуш Пулңават вошан «Полярный марафон» верыӆыса. Сита па яң километра хухаӆсам, па хуӆмет места усам. Па ӆапатан Воркута воша манӆам. Сита Арктической марафон питаӆ. Хольмаң пеӆа йи километра хухаӆты питӆам».
Мет апраң, юраң па сора хухатӆыты ай няврэмат, каблукаң нэңат па хоятат, хой вет километра хухаӆсат, дипломат па мойӆапсайт шитсат. Вет километрайн нэңат кутан оӆаң тахая Татьяна Никулина этас. Кимет места Ольга Мизина вус. Хуӆмет таха Олеся Мунтян шитас.
Ёх хоятат хося Сергей Костов Губкинской вош эӆты оӆаң места шитас. Кимет тахая Олег Кралин этас. Хуӆмет места Владимир Тусида вус. Нэңат па ёх хоятат хольмаң, ветъяң па ӆапатъяң сёрс соӆкува ёша паятсат. Каблукаң сопекан хухаӆты нэңат хося Юлия Денисова оӆаң тахая этас.
Лотерея верман ус. Кашң хухатӆыты хоят сита касты верытас. Туп мет ой тайты ёх мойӆапсайт шитсат. Яӆпа этты газетайн си касапсайн касты ханты хоятӆув эӆты потрэв еӆӆы туӆэв.
Альбина Тырлина ханшам потар
Авторы
Лух Авт
Темы