Лух Авт
Касапсайн оӆӊа этам ханты пох
Ун кер тыӆащ хусмет хатӆатан Екатеринбург вошан «Наследие Урала» рут мир ӆумтам сох па хорамат этаӆтаты уйтантопса ус. Хон мувев арсыр мув суӊат эӆты няӆъяӊ тус ёшаӊ хоят там касапсая яха ёхтыӆыйс.
Верантты мохет кутан ханты хоятэв па ус, щит Сергей Валерьевич Аляба. Ӆув Пулӊават вошан округ верантты хотан рупитаӆ. Юх, ӆов, карты па оӊат ӆов эӆты пуклайт, лыптат, хорат эватаӆ. Няврэмат па мойӊ хоятат самаӊа верты вераӆа утаӆтаӆ.
«Муӊ таӆан партсаюв, рупата сахат, там касапсая заявка нэпек ханштыя. Ун кер тыӆащ оӆаӊмет хатӆатан айкеӆан ёхатсайм, пирыты ят сохнам юпийн, Екатеринбург воша вохсайм. Щита ма «Там йисан сох пиӆан тайты хорамат» номинацияйн кассам. Касапсая, ма верам рупатайӆам эӆты, ёх хоят антапкеӆат тутӆысам па нёхты хор альсам. Ар мир хоятат пеӆа потар тусам, хоты ханты ёх хоятӆув катра пора эӆты ин там хатӆат унты антапкеӆат тайӆат. Хой муй щиран хораматӆаӆӆы, муй хорпи лыпатан па анщаран понӆаӆӆы. Антапкеӆ хоща муй па уӆ, па муй кеша щит верӆа, щит эӆты потарсам.
Рупатайӆам этаӆтамем порайн, манэм няӆ айӆат пох нётас. Хорамаӊа эвтам антапкеӆӆам ӆуматман, ӆув сцена хуват шушиӆысат. Нётам няврэмата ун пумащипа ясаӊ китӆам.
Там касапсайн оӆаӊ тахая этсам. Ӆыпеман шеӊк аматсам. Верам пормасӆам тус ёшаӊ воӆаӊ хоятатан кащаӆасайт па ишаксайт. Рупатаем хоща щит ищи ям вер», — мойӆапса шитам, тус ёшаӊ ханты похев ястас.
Зоя Куртямова ханшам потар
Авторы
Лух Авт
Темы