Лух Авт
Кат ясаӊан ӆуӊтарат па потрат ханшаӆ
Там ванан Югра мув округев ӆоватан Финно-угорской мир писателят уйтантопса манас. Щаӆта итухаӆ киникайт ханшты ху ёхат па нэӊат Кондинской район «Силава» («Будущее») этнопарк таха вантыты тутлисайт.
Ищи порайн ма Марий Эл муваӊ киникайт ханшты нэ Лидия Иксанова пиӆн уйтантысман па ияха япсыена потрэмисман.
– Лидия Геннадьевна, хота сэма питсан, энапсан, еӆӆы утаӆтысан муй усан?
– Ма там нови туром иӆпия Кумужьял куртан Моркинской районан Марий Эл мувемн 1966-мет таӆн ёхатсам. Юхат 1973-мет таӆэм вуш эӆты па 1984-мет таӆ вуш унты Кумужьял кутоп ашкуӆа хоща утаӆтысам.
Щиӊанща па еӆӆы 1984-1989-мет таӆатн историко-филологической факультетн Марийской государственной университетн туса утаӆтысам. Университет етшаптамем юпийн йи таӆ сыс киникайт эсаӆты таха хоща рупитсам. Щи юпеман Шуарсолинской кутоп ашкуӆайн няврэмат рущ ясӊа па литературая утаӆтыман усам. Тамхатӆ ма иса И.С. Палантай нэмпи Колледж культуры па искусства тахайн похат муй эвет утаӆтаман уӆӆам па рупитӆам. Уӆапсаем хуватн ямкем ар ӆуӊтар ханшсам. Щи верэм ураӊан поэтесса, писатель, драматург нэӊа ищиты щи ӆуӊтасӆам, Союз писателей России таха хоща уӆӆам па педагогической наукайт кандидат нэӊа па йисам.
Аратэӆн уӆты-хоӆты щирэм хуватн 11 ӆуӊтараӊ нэпек ханшсам, ӆуӊатты щирата эсаӆсам. Щиты 11-мет киникаем «Мувн уӆтыя мет ям вошн» нэмн юкантсэм. Ма, ванта, арпелак мари ёхӆам рут мир ясаӊан сыр-сыр ӆуӊтарат па потрат кашӊ пуш ханшӆам. Туп ёхи хащам пораятн рущ мир ясаӊан ма ищиты щи киникайт ханшты питсам. Щаӆта щи вер тумпийн, арсыр поэтат ханшам хорамаӊ ӆуӊтарат-потрат рут мирэм ясӊа толмащтатыя питсам.
Кашӊ яӆпа ёхатты хатаӆн муӊ рут ясаӊӆувн шеӊк шимаӆ хатнэху нэпек ӆуӊатӆ, щи вер ураӊан муӊева рущ ясаӊан ищиты тамхатӆ киника эсаӆты мосӆ. Ӆуӆан муӊ рут мари ёхӆув литература па культура рущ ясаӊ онтасэвн ищи япсыена еӆӆы хоятатн ат туса.
– Наӊ тата ястыӆысан, хоты туп рут ясаӊан ӆуӊтарат па па потрат ханшӆан, матты киника, аӆпа, рущ ясаӊан ханшсан па эсаӆсан?
– Муӊ щикуш арсыр мосты верат верӆув, ӆуӊтарат па потрат мари мирэв ясаӊ щирн кашӊ пуш туса ӆэщатӆув па ханшӆув, ищипа муӊ ясӊев муй культура верӆув ай ёхӆувн ёрэмаӆайт па еӆӆы иса ант па тайӆайт. Щимащ вер ураӊан ма юхатшак таӆаӊ кат ӆуӊтараӊ киника иса рущ ясаӊан ханшсам па ӆуӊатты щирата эсаӆсам. Оӆаӊ отэм — щит «Я подарю свою любовь». Кимет нэпекем «Мелодия ночного танго» нэмн юкантсэм. Ма щирэмн, ин щиты мосаӆ ястатыя, хоты щи киникайӊан ма ай ёхат ураӊан тата ханшсам. Нумастэмн, ӆый ищипа еӆӆы уӆты-хоӆты щирэӆн яма ӆуӊатты питӆайӊан.
— Мосӆ муй анта кашӊ таӆ сыс тамащ Финно-угорской мир писателят литературной уйтантопсайт тата Югра мувн еӆӆы ӆэщаттыя?
– Ма щирэмн, тамащ Финно-угорской писателят уйтантопсайт кашӊ таӆэв сыс ӆэщатты мосӆат. Анта туп Югра мувн кашӊ пораятн щи отат вертыя. Муӊ Марий Эл мувевн па па финно-угорской мират уӆты муватн па щитат ӆэщатты мосӆат. Ма нын Овс мувн хоща мет оӆаӊ пуш там товийн усам. Тащаӊ па шеӊк хорамаӊ мувн нын уӆӆаты. Ма нумастэмн, тамащ ун, ӆащкам, ищки Югра мувн нопсаӊ, ошаӊ-щащаӊ хоятат энамӆат па уӆӆат!
Владимир Енов ханшам потар
Авторы
Лух Авт
Темы