Лух Авт
Катра пормас шавиты хот няӆъяӊмет таӆаӆ постас
1985-мет таӆан ун кер тыӆащ хольмаӊ пеӆа няӆмет хатаӆан Мужи вошан йис пормасат шавиты хот оваӆ пуншас. Няврэмат утаӆтаты хоята рупитты па уӆты муваӆ шавиман тайты Григорий Сергеевич Пузырёв Ӆорвош район совет ветеранов пиӆан тамащ номас понтсат. Районной Совет народной депутатат исполкоман нэпекат рупатая вусайт па щи вер постаса.
Щи хатӆ эӆты няӆъяӊ таӆа йис, хоты Ӆорвош район йис пормасат шавиты хот рупитты питас. Йи ай хотые эӆты няӆ тахая энмас. Районной йис пормасат этаӆтаты хот хоща Овкуртаӊ катра пормас шавиты хот пиӆтащас, Мужи вошаӊ саран хот па Ханты-Мужийн уӆты парк-музей «Живун» таӆаӊ курта энмас. Итан-итан катра пора пормас акатман, тамхатӆ хоятата этаӆтаты экспозиция пормасӆаӆ щёрас моӆтас арата йисат.
Няӆъяӊ таӆ сыс музей хотан рупитты хоятат йи тахайн па ант ӆойсат. Пормасат акатман, хоятат пиӆан уйтантысат, утаӆтысат. Ёша питам кашӊ сох, муй па хор эӆты, таӆаӊ потар ханшты мосаӆ. Щит ищи ун рупата.
Там йис арсыр технологияйт утаӆтаман, компьютер хуват моӆты сох эӆты вантты па ӆуӊатты рахаӆ. Ёӆан омасман, хоят матты ки пирыйм музей харан шушиӆыйӆ. Тухаӆ пормасӆаӆ пиӆан район ай куртат па Ёмвош округ вошат хуват касаӆман яӊхӆат. Щиты яӊхман, хоӆна муй арат хоят катра яӆап верат эӆты уятты питсат.
Йис пора пормасат, уӆапсаев, тамащ хотатан шавиман, еӆӆы уӆты айӆат ёх хоятата потартман, шоши уӆапсаев нэмоӆты порайн ант хоӆаӆ, нумман тайман веккеша уӆты питаӆ.
Катра пормас шавиты хотатан рупитты хоятӆува мойӆапса ясаӊ китӆув. Нын, кеӆ ӆэр иты катра па там йис уӆапса яха ярман, еӆӆы туӆӆан. Хоӆна ар ощхуль пормас нын ёшӆана ат питаӆ. Тэӆые ошаӊ, самаӊ хоятатан ат ёхтыӆыӆайты, инщасӆайты, потра хущӆайты. Тумтак ёш па тумтак кур, еӆӆы пеӆа!
Зоя Куртямова ханшам потар
Авторы
Лух Авт
Темы