Лух Авт
Катравош нэӊат нётапса
2025-мет таӆ округеван герой Таӆа постаман уӆ. Там йисан шоши мув хоятӆув хон мув ёх пиӆан ияха СВО харатан уӆӆат. Ямал мув кашӊ вошан, куртан уӆты хоятат сита уӆты ёхӆува муйн верытӆат, ситан нётӆат.
Там лопасан Катравош куртаӊ хоятат, Воӆаӊ Ляль порайн няврэмата уӆам нэӊат па Ямал мув ветеранат яха актащман, там уӆты ляль харан уӆты хоятата нётапса верӆат.
Кат таӆ сита куся нэӊа Альбина Никоноровна Кельчина уӆ. Ӆув сит эӆты потар тус: «Си хоятат кеша каш верты хотан вератты харат рупитӆат. Сита ӆув яха уйтантыӆат, шай йинсьман потрэмиӆат, вератӆат: сэвӆат, ёнтасӆат. Ляль харан уӆты хоятата сэвам вайт, посат, милат сэвӆат. Ӆув актам охеӆан, свеча верты айм ӆутсат. Свеча вет ӆарась тыйс. Мосты пормасат акатӆат. Там мосванан осамхират па хошам лаӊкасты сохат акатсат. Ӆув си вер пеӆа шеӊк самаӊат. Муйн верытӆат, ситан нётӆат.
Ӆуӊан Маргарита Петровна Батютенко (Кельчина) Сочи муван сютсийс. Сита уӆты Татьяна ӆухас нэӊаӆ пиӆан уйтантыйс. Сиӆта нэӊӊан ош пун кат хир Пулӊават воша китсаӊан. Там мосванан посылка-хирӊан куся нэӊан Катравоша тусайӊан. Си пун тусаӊа вератты нэӊат нэман верам юха ӆарытӆат па сохма верӆэӆ. Щаӆта па СВО хося уӆты хоятата мосты пормасат сэвӆат. Си вер эӆты нумасман, пойк ясаӊ ӆуӊатман, самӆаӆ эӆты манты нётапса верӆат».
Си хоятат кутан — Мария Хаютовна Серасхова, Мария Николаевна Гудкова, Светлана Владимировна Бухарова, Мария Николаевна Кузаметова, Тамара Никифоровна Серасхова, Людмила Васильевна Кондыгина, Светлана Николаевна Нева, Анастасия Ивановна Сайнахова.
Муӊ па си тус ёшаӊ нэӊиета пумасипа ясаӊ ястаӆув. Тумтак ёш, тумтак кур! Ияха, нётман па ям вер верман, лялян уӆты хоятӆув пиӆан ляль етшаты хатӆ ванэмаӆув.
Альбина Тырлина ханшам потар
Авторы
Лух Авт
Темы