Лух Авт
Катщавой нюраман сэмна питам нэ
Елена Семёновна Ребась Катщавой нюраман Ас нопатты тыӆащан хольмаӊ пеӆа ӆапатмет хатаӆан щёрас яртъяӊсот ветъяӊ пеӆа ветмет таӆан сэма питас. Аӊкеӆ Мария Семёновна Ребась (Хунзи), ащеӆ Семён Николаевич Ребась. Ӆын тащ хотан яӊхсаӊан.
Аӊкеӆ-ащеӆ хуӆам няврэм тайсаӊан: кат эви па йи пох. Елена Семёновна ащеӆ аӆаӊ антома йис. Щи юпина аӊкеӆ няврэмӆаӆ пиӆан нык охӆас. Тови куртан уӆты питсат. Щи курт Усть-Войкар лепан уӆ. Тови куртан Нёрапса рут ёх усат. Елена Семёновна нумӆаӆы, щита ар ӆов энмаӆса. Щи ӆоват почта таӆӆыты кеша тайсайт. Тови курт мохты ям таӆӆыса Пулӊавт унты.
Ай пора эваӆт ӆув уйтӆаӆы, хоты ӆаварт торн сэварты, хуӆ-вой веӆпасӆаты. Аӊкаӊкеӆ совхозан рупитас, щишан Еля щи ӆаварт па шук пора нумӆаӆы. Ащикеӆ муш эваӆт аӆаӊ парас. Оӆаӊмет классан Мужи куртан утаӆтыйс. Па щи юпийн хутмет класс унты Восяхово куртан утаӆтыйс. Ашкуӆа вераӆ Еля хайсаӆӆы. Ӆувеӆ мосас ёӆн рут хоятӆаӆа нётты.
Пора манас. Еля Туляховат рут хоща манас. Ийикеӆ Гаврил Петрович Туляхов пиӆан Поращ куртан усӊан. Щита пиӆаӆ пиӆан вет таӆ ус. Ӆын няӆ эви тайсаӊан, и эвеӆ па порана антома йис. Елена Семёновна оӆаӊ няврэмӆаӆ пиӆан таӆ хотан хащас. Ийикеӆ парам юпийн, Айвош ёхан пеӆа Вершина-Войкары курта уӆты манас. Щита таӆ кем певаӆты хотан рупитас.
Юхатшак Елена Семёновна Восяхово курта почта хота рупиты вохса. Ай пора эваӆт Еля ивеван нумасас па ӆытас почтайн рупитты. Щи яӆап рупитты лотаӆ эӆты хувн номасан ӆытса. Эвеӊаӆаӆ Галя па Алла пиӆан тохи щи манас уӆты. Ӆув щита арсыр рупата верас: кур аӆас, пищмайт хоятата тус. Пенсия унты щита щи рупитас. Моӆты хуват почтайн куща нэӊа рупитас. Инты унты Елена Семёновна куртаӊ хоятӆаӆна ям ясаӊан ястыӆа па кащтыӆа.
Ӆув шеӊк самаӊ, потраӊ, вераӊ, араӊ-монщаӊ хоят. Ай пора эваӆт хуӆантас па номасан ин там унты шавиӆӆы па няврэмӆаӆа, хиӆыӆаӆа арыӆӆы па монщӆаӆы. Ун эвеӆ Галя аӊкиеӆ иты хорам ханты арат арыйӆ, ханты якат якаӆ, ханты уӆапса эваӆт ар уятаӆ па энамты няврэмата аляӆ па потартаӆ. Ай эвеӆ Мария хуӆам няврэм тайӆ. Ӆув Пулӊавт вошан уӆ. Ин Елена Семёновна кутап эвеӆ Алла пиӆан Харп куртан уӆ. Тампуш ӆув нийӆъяӊ таӆа йис. Елена Семёновна пиӆан ма па уйтантысам, па ӆув эӆтэӆ монщ, ар ханшсам.
Любовь Возелова ханшам потар
Авторы
Лух Авт
Темы