Лух Авт
«КедрФест» каш верты хар
Унт ӆор тыӆащ хатӆатан Ӆорвош районан «КедрФест» каш верты уйтантапса манас. Там пуш мет ун хар Ващъёханован ӆарпитса. Тата, ун нохар юхат иӆпийн, вошаң па мойң хоятат, касты па тынасты ёх яма щутщасат, утаӆтысат, арысат, яксат, ӆухасӆаӆ па рутӆаӆ пиӆан уйтантысат.
Каш манты харан вет площадка: щутщаты, ӆэтот кавартты, юхат кутан ярам кеӆ юшат, касты па рупитты харат рупитсат. Найң, хошам хатаӆан, сай тахайн еша щутщаты рахас. Хоӆап иты сэвам оӆты тахайт ун юхат кутан ярман усат. Ёлах тахайн оӆа, тятьтия.
Ӆэтот верты харан хуӆ, нёхи ӆантаң путат кавартсайт. Нохар сэм пиӆан верам арсыр ӆэтот, ӆант, мис йиңк, щанька, нянь, мампащ па па хорпи мават пулэматы рахас.
Ай няврэмат умащӆыман кеӆаң юшат хуват ваңкатӆысат, кеӆа катӆащман шушиӆысат, навартсат. Касты харан мет руваң ус. Тата ху па айӆат ёх, нэңат, эвет апраңа ешащман ӆоваӆман, хопан кассат, катра юх эватты картыйн куӆ юхат эватсат, торан сэварсат. Щаӆта сэврам торанӆаӆ ун торны пая ёваӆсаӆӆаӆ.
Рупата манты харан нэман вохам хоятат потар тусат, хоты туризм ӆэщатты рупата еӆӆы туты па аршак мойң хоят ёхатты ураңан муй верты мосаӆ. Ӆорвош район куща ху Олег Попов айӆат ёх пиӆан уйтантыйс. Инщассаӆӆы, хой хота рупитаӆ, мосаң хой номас тайӆ, рупата щиран кущая йиты. Няврэмат, хой муй хорпи номас тайсат, иса потартсэӆ. Каматса ястам вер рупатая вуса. Рупата верэӆ нох пайтты ураңан, маты отат па охан нётты ястасайт.
«КедрФест» уйтантапса ар хоят актас. Там анта аӆ каш верты хар. Тамащ уйнтантапса хуват ныӆа, муй хорпи самаң хоятат Ӆорвош районан уӆӆат. Муй хорпи уӆты мувев хорамат тайӆ. Муй хорпи вератты, ёнтасты, тус ёшаң хоятат тата уӆӆат. Ма нумасӆам, пора хащтыйн, там каш верты харэва па мув сыӆ хоятат па ёхтыӆыты питӆат», — «Земля Лугуя» туризм центр куща нэ Анна Брусницына ястас.
Зоя Куртямова ханшам потар
Авторы
Лух Авт
Темы