Лух Авт
Кев тум пелка касаӆты пора ёхтас
Тампуш, ищки хатӆат юпийн, роман мелак тови хошам хатӆат ёхатсат. Ӆонщ роман ӆоӆас па Ас еӊк эӆты йиӊк этас. Хатӆат хува йиты питсат. Тащ хотатн рупитты хоятат кеша Кев пеӆа касаӆты пора ёхтас. Ӆув ин ӆэӆтасты питсат. Ун юш ям эӆты, тухӆат ун вошата, Пулӊавта па Лапатнаӊка яӊхсат. Щита, ванты, ӆэтотӆаӆ па пормасӆаӆ тынӆышакат. Па муй сама ӆэщаӆаӆ, щит вуӆат.
Хойтат кум ант шитсат ун воша яӊхты, ӆув куртаӊ ӆапкайӆаӆн ӆэтот ӆутсат. Итухӆат Мужи вош ӆапкаятан ӆэӆтассат. Мосты шук ӆэтотат, муй сама рахаӆ, тащ хотаӊ хоятат ӆув щи ӆутсат. Мет такан мосты: нянь, пуӆка ӆат, шай па саккар так юш хуват хотата тусаят. Щи тумпина тампуш яӆап парщин сыхат, нуйт па карты курат Ӆорвош район утхот эӆты масайт. Ёх яӆап парщин сохат па рещина сопекат каншсат. Муй мосты пормас — иса щи патан ӆэӆсат.
Ешауӆ ашкуӆа няврэмат айӆта ёхи эсаӆты питӆайт. Патан ханшты нэпекат па книгайт вуӆат. Ӆуӊ сыс ханшты па ӆуӊатты мосаӆ. Няврэмат аматман хотата манӆат. Сус-таӆ ӆавӆассат, хун антиӆаӆ-ащиӆаӆ па авкайӆаӆ хоща ёхи эсаӆӆайт. Ӆув ёхи ёхатман яма нётӆат. Касаӆты порайн рупата ар: хот лосытты па ӆонщты, сох ват ухӆата хушты, ӆонщ па йиӊк аӆты, юх эватты па сэварты мосаӆ. Хота юр ёхатӆ, щита нётӆат. Антиӆаӆа-ащиӆаӆа, касаӆты порайна, щимащ нётапса мохты щи кеншак.
Оӆаӊмет вуӆы тащ сельхозпредприятие «Мужевское» хоща рупитты ёх пиӆна еша потрэмисув па инщассув, хоты ӆув Кев пеӆа манты ӆэщатыӆат.
– Ма ашкуӆа юпина мохты ёӆан хащсам. Яйӆам-опиӆам иса вошатан уӆӆат. Хотан ищи мосаӆ рупитты. Опращӆам юш нюхаӆӆэм. Тови мелак пора сора ёхтас. Ин еӆӆы касаӆты мосаӆ. Ешауӆ ӆэӆтасты питӆув. Ӆэтот ӆутты охна совхоз эӆты хоӆна ант масаюв. Муй шоши ох тайӆув, щитна щи ӆутасты питӆув. Пулӊавта ӆутасты манӆув. Ар пормас патан ант туӆув, ӆаварт питаӆ. Шеӊк такан нянь мосаӆ, — вуӆэӊ ху Пётр Артеев ястаӆ. — Еӆӆы Танюва хоща касаӆӆув, щита хоӆап омасты рахаӆ, яӆап хуӆ ӆэӆув. Сорам хатӆатан нянь ванщты па сораӆты питӆув, ант ки ванщӆэв — вонщала манӆат, хишиӆаӆайт. Нянь сораӆты сыс суювӆув еша энамӆат.
Хоты щи еӆпийн, 20-30 таӆ хащаман, Кев пеӆа манты кеша ӆэщатысат, муӊев Любовь Романовна Озелова каматса ясаӊ ястас. Ӆув ин пенсияйн щутщаман уӆ. Пора хайман хота яӊхаӆ, няврэмӆаӆа па хиӆыӆаӆа нётаӆ.
– Кум шитман вуӆы хота ийикем пиӆан яӊхӆаман. Утаӆсув иса ёлах тахайн уӆты. Щиты антиӆув-ащиӆув, няврэмӆам ун антет па ун ащет яӊхсат. Ияха усув, касӆысув, — Любовь Романовна потараӆ. — Катрашак, 80-90-мет таӆатн, муӊ совхоз эӆты ох юкана ӆэтотан мийӆысаюв. Ӆэщаӆаӆ наӊен ант ӆэщаӆаӆ, хойн инщасӆаюв. Муйн маӆайн, щи ӆэтот щи туӆан. Ин там йис ӆапка тэӆыя, хоятат муй сама рахаӆ, муй мосаӆ щит ӆутӆат, туп ох тайты мосаӆ.
– Муӊ тампуш оӆӊашак ӆутасты па ӆэӆтасты питсув. Туняӆ таӆатна ёхи хащман па йиӊк-нёӊхал кутна ӆэтотат пиӆна таӆасысув. Щишна тампуш оӆӊа ротая айӆта мосты пормас ӆутсув. Пулӊавта вер сахат яӊхман, айнайн таӆ сыс шук ӆэтот вусув, — оӆаӊмет тащ куща ху Виталий Озелов айкеӆ китас. — Кашӊ таӆ ӆэтот тынаӊа йиӆ. Мосты пормас ищи тынаӊ. Щишна таӆ сыс ох сопасӆысув.
Сус пора унты сопасӆыйм ӆэтотӆаӆ тарамӆат. Вуӆэӊ ёхӆув Кев тумтака ат уншӆэӆ па тащӆаӆ уна ат энамӆат.
Иван Сандрин ханшам потар
Авторы
Лух Авт
Темы