Лух Авт
Кева касаӆты питщасат
Ас нопатты тыӆащ. Мелка йис. Ӆонщ ӆоӆаты питас. Хоятат, войт самата амат ёхтас. Хоӆ ӆуӊ пора кеша ӆэщатыӆат. Вуӆы щавиты хоятӆув ун кер тыӆащ оӆаӊ шупан ӆуӊ пормасӆаӆ акатсат, ӆэтот ӆэӆсат, Кев пеӆа касаӆты питсат. Ин там унты тащӆаӆ вошат эӆты хува мантсат. Тащ ёх верат эӆты хой хоятат пиӆан потрэмисам.
МСП «Мужевское» вуӆы леккар Алексей Озелов тамащ айкеӆ верас: «Там ванан МСП «Мужевское» оӆаӊмет тащ ёх пиӆан вуӆы катаӆты яӊхсув. Таӆ сыс ӆув тащеӆ эӆты хой вуӆыӆаӆ ур таща питсат. Кева манты еӆпийн, пушасан катна ортсаӆӆув. Вуӆыӆаӆ ёша пайтам юпийн, оӆаӊ тащ ёхӆув касаӆты питщасат. Ӆув, ванты, моӆхашак ӆэӆтассат, касаӆты кеша актащман усат».
Каматса хатӆ сайн МСП «Мужевское» няӆмет тащ куща ху Вячеслав Лонгортов Юлия йимеӆ пиӆан тащ хот эӆты Овкурт воша ёхатсаӊан. Юлия Лонгортова пиӆан телефон хуват потарсам. Ӆув касаӆты вер айкеӆат эӆты тамиты потартаӆ: «Мин ӆонщхопан ёхатсаман. Хува касаӆсув, хотэв ин Кев иӆпийн ӆойӆ. Хоптыӆув щалитты ропахан ӆонщхопан ват ухаӆӆув, ухаӆӆув касӆаптысӆув. Кат ухаӆан каратсаӆӆув па щиты щи тусӆув. Ин ӆонщ хоӆна оӆаӆ, кентат мантсув. Муӊ оӆаӊ пуш щиты Кев унты онасӆув ёхтаптасӆув. Еӆпи иса вуӆыйн касаӆсув. Бензин щикуш ар манаӆ, вуӆыӆув ант шукащсат — щит муӊеван мет ям. Тащев тампуш ищи ямас ёхӆуван воштаса.
Щахашак, ӆонщ хоӆна оӆтаӆ пуляӊ, Кев уншӆэв. Еӆӆы хоптыйн онасӆув касӆаптаӆӆув. Кев тум пелакан нянь сораӆтӆув, нэ вуӆыӆув омасӆат».
Вуӆэӊ мохиӆув яма Кева ат яӊхӆат, ёхӆы тумтака ат ёхатӆат! Вуӆыӆаӆ ат арамаӆат, войн ант ат катаӆӆайт, ант ат мушамӆат!
Валентина Рохтымова ханшам потар
Авторы
Лух Авт
Темы