Лух Авт
«Кочевая семья – 2026» касапсая ёхтыӆыйм ханты хоятат
Надым вошан вуӆы ёх емаӊ хатӆат манты порайн, шоши мир хоятат ар хорпи касапсайн кассат. Кашӊ таӆ сита «Кочевая семья — 2026» ольпаӊ вантопса верӆа. Округ районат эӆты ёхтыӆыты ханты, ёрн ёх, ур хоттэӆат уӆапсаеӆ этаӆтыӆат.
Тампуш нийӆ хоттэӆ касас. Хантэт эӆты хуӆам хоттэӆ ус — Приуральской, Ӆорвош па Надымской район. Тасян яӊхты кат ханты семья оӆаӊ тахая этсаӊан. Сит — Ӆорвош район Мужи вош Талигин рут ёх па Приуральской район Байдарацкой нюрм эӆты Климоват хоттэӆ.
Ӆорвош район эӆты касам хоттэӆ
Надым мува Ӆорвош район эӆты «Мужевское» сельскохозяйственной предприятияя ӆуӊтасты Талигин хоттэӆ ёхтыӆыйс. Евгений Анатольевич па Надежда Емельяновна тащ хотан яӊхӆаӊан. Няӆ няврэм энмаӆӆаӊан. Кат эвеӆ па похаӆ Васьёханов ашкуӆайн утаӆтыӆат, ай похиеӆ аӊкеӆ-асеӆ пиӆан касӆыман яӊхаӆ.
Манам касапсая ӆын няврэмӆаӆ па рутӆаӆ пиӆан ёхтыӆысӊан. Сит эӆты Евгений Анатольевич каматса ясаӊ ястас: «Муӊ Мужи совхозан кимет хотан рупитӆув. Ма кусяя уӆӆам. Бригадайн хут хоят, хоӆ рутат: апсем, упем, хиӆэм. Таӆан хуӆам хотан уӆӆув, ӆуӊан — катан. Кев тум пелка касӆыӆув. Ай уӆмем пора эӆты аӊкем-асем пиӆан касӆыман яӊхсам. Муӊ Тильтим курт эӆты.
Хоттэӆ хоятӆам пиӆан Надым воша оӆаӊ пуш ёхтыӆысув. Катра порайн ма вуӆы ёх емаӊ хатӆата касты сирн яӊхсам. Пулӊаватан катӆэм пуш усам.
Оӆаӊ хатаӆан вантопсайн сохӆув, пормасӆув, ӆэтотӆув альсув. Кимет хатаӆан нэӊат ухаӆ этаӆтысув, эӊкурап ар арысув. Кум тайты порайн ухаӆ, тынсяӊ верӆам. Таӆ ухаӆ сумат юх эӆты верӆа, ӆуӊ ватухаӆ — хуӆ, сув — сумат эӆты, хой хуӆ эӆты. Ин вератты шеӊк кум ант шитӆам. Сяха, нык охаӆӆа, си порайн, ротая омасман, нёхратӆа. Мосаӊ моӆты хоята мосмитаӆ».
Опеӆ — Вера Михайловна Талигина па ус. Ӆув па каматса ясаӊ ястас: «Ма хут таӆ кимет хотан касӆыман яӊхӆам, апсема нётӆам. Си еӆпийн Ноябрьск вошан усам, сита хольмаӊ пеӆа ӆапат таӆ телеграфиста рупитсам. Сяӆта ёхӆы йисам. Мужийн яӊ таӆ рупитсам. Там емаӊ хатаӆан нэӊат ухаӆ ӆэсятсув, таӆ сохӆув альсув, вантопса ӆэсятсув, еша якапсув па арэмасув».
Байдарацкой совхозан рупитты хоятӊан
Приуральской район эӆты па ханты хоятат усат. «Кочевая семья» касапсайн Климоват хоттэӆ касас. Ӆув па оӆаӊ тахая этсат. Виталий Иванович па Екатерина Гавриловна касӆыман яӊхӆаӊан, Байдарацкой совхоза ӆуӊтасӆаӊан. Вет няврэм энмаӆӆаӊан.
Виталий Иванович потар тус: «Надым воша семьяеван ёхтыӆысув, ийимем па няврэмӆув. Хоӆ муӊ пиӆэван. Хоӆна упам ики — Гаврил Алексеевич Затруев муӊ пиӆэван яӊхас. Надым воша оӆаӊ пуш ёхтыӆысув.
Ма ай пора эӆты тасян яӊхӆам. Аӊкем — Екатерина Андреевна Климова, ӆувеӆа ярсот таӆ. Ӆув хоӆна таща яӊхиӆыйӆ, таӆан туп. Ӆуӊан куртан уӆ. Таӆан муӊ Епседей ёхан пуӊаӆан ӆойӆув. Охсарка эӆты катсот пеӆа хус километра. Ӆуӊан сярс пеӆа манӆув, хота Кев етшаӆ.
Хуӆмет тасян бригадира рупитӆам. Вуӆы шавиты хоятат ма пиӆэман яӊхӆат. Няӆ хотан уӆӆув. Совхоз вуӆэт тумпийн, хоӆна муӊ ёра вуӆэт тайӆув. Яӆап таӆ ёхатты еӆпийн, вуӆыӆув ӆуӊатсайт. Си порайн хуӆамсоткем вуӆы мийӆысув. Ин емаӊ хатӆат манты юпийн, Белоярск воша хоӆна вуӆэт хорсащты воштаӆӆув».
Каматса ясаӊ хоӆна ийимеӆ — Екатерина Гавриловна Климова ястас: «Ма асем па аӊкем касӆыман яӊхсаӊан. Асем совхозан рупитас, заслуженной работника уӆ. Аӊкем — Мария Николаевна Лаптандер, ӆув ур нэ, па тасян яӊхас. Ун похема хольмаӊ пеӆа йи таӆ. Ӆув па мин пиӆэван касӆыман яӊхаӆ, асеӆа нётаӆ. Эвиӊаӆув тайты сохӆув этаӆтысӊан, арысӊан.
Вантопсайн сохӆув, пормасӆув альсув. Ма катхосьяӊ таӆ эӆты ёнтасты питсам. Аӊкеман утаӆтасайм. Оӆӊа ханшет ёнтсам, айт, уншак отат. Сяӆта вайт. Си юпийн туп сахат ёнтты питсам. Няврэмӆам, пиӆэм иса ма сохан ӆэсятӆаӆӆам».
Надымской район эӆты уӆам ханты ёх
Кашӊ таӆ Надымской районан верты емаӊ хатӆатан аршак хоят касапсаятан касты питас. «Кочевая семья — 2026» касапсайн Надымской район Сугмутской месторождение вуӆы тащ хот эӆты Мултановат хоттэӆ ёхтыӆыйс. Хоӆна хуӆам касты команда ус. Йи командайн иса хантэт актыӆысайт, яӊ хоят касас.
Лозямоват, Мултановат ёх Надымской район нум пелакан Ноябрьск вош пуӊаӆан уӆӆат. «Надым» община кусяя уӆты ху Дмитрий Петрович Лозямов потар тус: «Муӊ Надымской района ӆуӊтасӆув. Тата уӆӆув, тата сэма питсув. Тащан яӊхты хоятӆув няврэмӆаӆ Муравленко вошаӊ ашкуӆа-интернатан утаӆтыӆат.
Муӊ кашӊ порайн туп Надым воша вуӆы ёх емаӊ хатӆа ёхтыӆыӆув. Ты яӊхты юшев ваншак. Хасям таӆатан Ноябрьск вошан емаӊ хатӆат верты питсайт, тохи яӊхты питсув.
Там касапсая Виталий Ефимович па Татьяна Валерьевна Мултановат няврэмӆаӆ па рутӆаӆ пиӆан ёхтыӆысӊан. Хоӆна «Надым» общиная ӆуӊтасты ёх, «Кочевая семья — 2026» касапсая хоятат ӆэщатам нэ Софья Петровна Ермакова па ус. Ӆув па Ноябрьск вош пуӊаӆан уӆ, касӆыман яӊхаӆ.
Нёхты хор ӆэсятсув, альсув, хоты ёхтыӆыйм хоттэӆ уӆты тахаяӆан уӆ. Тайты сохӆаӆ, пормасӆаӆ вантопсая ӆэсятсаӆӆув. Каш ант алиӆысув, ант арысув. Муӊ уӆты Надым муваӊ хоятӆув кутан арыты хоят антом. Сишан си вер нох аӆамты мосаӆ. Няврэмат арыты утаӆтаты.
Тампуш яӊ ханты касты хоят тутӆысув. Нэмоӆты тахая ант этсув. Кушкепа ёхтыӆысат, юрӆаӆ артыӆысат, емаӊ хатӆ вантсат».
Еӆӆы пеӆа, тасян яӊхты ханты хоятӆув Вуӆэӊ ёх емаӊ хатӆата ат ёхтыӆыӆат, хорам сохӆув, пормасӆув, уӆапсаев ат этаӆтыӆат.
Альбина Тырлина ханшам потар
Авторы
Лух Авт
Темы