обновлено: 08:41, 20 июля 2023
Лух Авт
Кунават муван уӆты заказника хут тор туса
Там ӆапатан Кунавт муван уӆты заказника хут тор Окской государственной биосферной заповедник эӆты туса.
Хар тахая эсаӆты еӆпийн кашӊ вой спутниковой GSM передатчикан тахарса. Щи мутрайт онтасан ныты питӆа: хоӆта войт яӊхӆат, мата па хон мувата маныӆыӆат, па атаӊ-хатӆ хоты нэрыӆат. Няӆ таӆ сыс 23 вой эсаӆса.
Муй щит эӆты нумасӆат Саӊхамкуртаӊ хоятат, ма Виктор Александрович Тояров инщассэм. «Катра порайн нэмоӆты хоятан торӆув ант ӆуӊтыӆысайт, хой уятаӆ камн ус. Амуй шимӆамасат, амуй аршака йисат? Ин вантман тайӆайт па шеӊк ям. Щишан хонна хув тор увты сый хуӆты питӆув», — Виктор Тояров ястас.
Аратаӆан там Овс мувеван хоты ӆув уӆӆат иса ӆэр питаӆ. Ӆув па войт пиӆан артаӆаман уӆты тахаеӆ шеӊк такан пирыӆэӆ. Щи веран там вой рут шавиты шеӊк ӆаварт.
Аллина Тоярова ханшам потар