Лух Авт
Куш ӆаварт, туп шеӊк мосмаӊ рупата
Тата муӊ еӆӆы, Ӆоркурт хуӆ веӆпасӆаты ёхӆув эӆты, потар туӆув. Там лопсэван ханшӆув, хоты Ӆоркурт ашкуӆа няврэмат Леонид Петрович Русмиленко хоща яӊхсат па аршак хуӆ веӆпасӆаты щир эӆты уйтты питсат.
Ямал муван Овс мув шимӆаӊ мир хоятӆув арпелак тащан яӊхӆат па хуӆ веӆпасӆаман уӆӆат. Мув шув няртты тумпийн, там хоятӆув онтасан экономикаев нох аӆамман тайӆэв. Куш ӆавартаӊ рупатайт, туп там рупатайт шеӊк мосмаӊат. Таӆан — вот, ищки, аплак кутан руӊкатӆыӆат, омлэпат караӆыӆат, ёшӆаӆ потам йиӊкан потаӆтаӆат. Ӆуӊан па — вот, пеӆӊа, нипирув, ерт кутан ешащӆат…
Там уйтантопсайн Леонид Петрович ёхтам няврэмата потартас, хоты ӆув хуӆ веӆпасӆатыя яӊхиӆыйӆ. Мантаӆ порайн муй мосты пормас патан вуйӆыйӆ. Муй хорпи хоӆапан мата хуӆ мощатыты рахаӆ. Муй хорпи туром уӆӆыты порайн, хоты сахат хуӆ нёхӆыйӆ, мата тахаятан уӆӆыӆыйӆ. Няврэмата уйтам верӆаӆ эӆты потартас, щитӆаӆ ӆув хонна ун ащикиӆаӆ, ун овращӆаӆ эӆты хуӆӆысӆы.
Ёхтыӆыйм няврэмата Леонид Петрович аляс, хоты сахат туӊа-щира хоӆап сэвты мосаӆ. Муй хорпи муӊхална ярты, хоты налепкайн тахарты, муй хувататн. Щаӆта потартас таӆан па ӆуӊан хота хуӆ веӆпасӆыйӆ, мата тахаятан ноптаӆтыйӆ. Муй хорпи пормасат патан вуйӆыты мосӆат, куш таӆан, куш ӆуӊан. Няврэмат такан хуӆантсат, вантсат па хоӆап сэвты утаӆтысат.
Ӆув ин шеӊк яма уйтты питсат, хоты хоӆап ёнтты пормас нэмтыӆа — супас. Ӆув кашӊ хуӆ веӆпасӆаты хоят хоща уӆ. Ванты, мет шопаӊ хоӆап нопатты порайн, турамсот аӊкаӆ хоща тахарӆыты верытаӆ, щи юпийн тохты. Щишан, хоӆап сораӆӆа па ёнтӆа. Ям супас ёшан катаӆман, ёнтасты вер сора манаӆ. Таӆаӊ хоӆап ӆыпия аршак хуӆ питаӆ, пасан тэӆаӊа йиӆ.
Няврэмата умащ ус. Ӆув па аршак хуӆ веӆпасӆаты ёх рупата эӆты уйтты питсат. Щишан пумащипа ясаӊ ястасат, ям номасан лакки мантсат. Муӊ па Леонид Петровича ясаӊ китӆув: ойӊа-пищаӊа, йисаӊа-нуптаӊа! Аршак хуӆ мощатты, щеп охен ат энмаӆ, наӊ мосмаӊ рупата верэн еӆӆы ат туӆа.
Аллина Тоярова ханшам потар
Авторы
Лух Авт
Темы