Лух Авт
Луңханщап щулемас, ашкуӆа пора етшас
Там ӆапатан, аратаӆ хон мув ӆоватан, хольмаң пеӆа ветмет хатаӆан, 9-11 классатан утаӆтыты няврэмат ураңан хащам пуш луңханщап сыймийс. Утаӆтаты нэңат-ёхат, аңкет-ащет па няврэмат сэмъйиңк муңхиӆысат, кутӆаӆан ям ясаң ястыӆысат. Щикуш щаль, там ашкуӆа пора хащас, па хоты нэрыты, уӆапса йи еӆӆы манаӆ.
Пулңават вош оӆаңмет ашкуӆа куща нэ Оксана Дмитриевна Дорошенко щи веран каматса ясаң ястас: «Там пуш муң ашкуӆаеван ихощъяңмет классан 24 няврэм утаӆтыйс. Папуш ихощъяң класс муң хощаев ант питаӆ. Щишан там ятан муң хонна верытӆув уна ювам няврэмӆува хошам ясңат ястаты. Кашң няврэм муң самеван хащас. Ӆув вещкатэӆ, ямеӆ, хоят уӆапса щирэӆ ищиты еӆӆы ат туӆэӆ. Еӆӆы утаӆтыты щиран ӆув самӆаӆа рахты вер ат уйтӆат. Хота, ӆуӆан, кашащман па ӆаңхаман утаӆтысат. Ун тахайн утаӆтыты етшатэӆ юпийн па там рут мувеӆа ат ёхатӆат. Муң ӆувиӆаӆ ӆаваӆаӆӆув. Тумтака ат уӆӆат, еӆӆы ямас ат утаӆтыӆат!»
Харсаим ашкуӆа куща нэ Екатерина Валерьевна Климова ӆув тыхӆэӆ эӆты пурӆаты няврэмата ищи мойӆапса ясаң китас: «Тынаң няврэмиет, пошхиет! Там хатаӆ ма вутщиӆам, нын ашкуӆа эӆты манты хатӆанан, ям па хошам ясңат нынан китты. Нын еӆӆы манты юшан пайӆы ат уӆ, туп ям хоятат пиӆан ат уйтантыӆты. Кашң хоятэм туп ӆувеӆа рахты уӆапса щир ат уйтаӆ, самаңа тайты вераӆ еӆӆы ат туӆӆы, ойӆ пиӆан йи юш хуват ат шушаӆ. Так кураман шушты, ӆаварт эӆты ант паӆты. Постам верӆан паты унты туваӆан. Ямас утаӆтыяты, воӆаң хоята ювиӆыяты. Тумтак ёш, тумтак кур! Ойңа, пищаңа, йисаңа, нуптаңа!»
Там пуш Ӆоркурт ашкуӆайн луңханщап сый туп яртъяңмет классан утаӆтыты няврэмат кеша сыйимийс. Ванты ихощъяң класс няврэм — ит антом. Ин щита туп 9-мет класс яртъяң няврэм экзамен маты питаӆ.
Муң ищи мойӆапса ясаң китӆув. Ямас утаӆтыяты, ёхи аңкиӆан-ащиӆан уӆты мува ёхтаты, шоши мир уӆапса щират-пищат еӆӆы туваты!
Аллина Тоярова ханшам потар
Авторы
Лух Авт
Темы