Лух Авт
Ма мувием мет хорамаң
2024-мет таӆ Хон мувеван Хоттэӆ Таӆа постаман уӆ. Таӆ постатыя вошатан, куртатан арсыр вантопсайт, уйтантопсайт верӆайт. Там ванан Челябинской юридической колледжан таӆ постаты кеша «Мистер и Мисс ЧЮК» вантопса верса.
Ӆапатнаңк вошан сэма питам па щита энмам эвие — Румия Муслимова, ашкуӆа етшамаӆ юпийн, Артём Федоренко ӆэхуйӆ пиӆан Челябинской юридической колледжа утаӆтыты мантсаңан. Па вошан пиӆаңа уӆман кеншак. Ашкуӆайн утаӆтымаӆан, Румия арсыр касапсаятан, каш верты харатан касас. Ин па еӆан ант хащас.
Утаӆтыты тахаяӆан ар мув сыӆат эӆты няврэмат яха ёхатман уӆӆат. Кашң ӆув мир ёх рут хоята уӆ. Там вантопсайн, кашң хоята, ӆув уӆты муваӆ па мир хоятӆаӆ эӆты потар туты мосас.
«Ма антем Лариса Васильевна Муслимова (Куртямова) Щаня мув эӆты. Ӆув манэм ай тэӆан ёнтасты, сак каратты, сохам сэвты утаӆтасӆы. Вантопса айкеӆ хуӆмем порайн, мохты номасан ёхатсайм, уӆты мувем эӆты айкеӆ верты. Антем-ащем утаӆтыты вошема вохсаӆӆам. Ёнтам ханты ху па нэ ернасат, хират, тучаңат, сак лопсат па ёнтты пормасат патан туты партсаӆӆам. Артём ӆэхуем пиӆан Овс мувеман хорамат эӆты нёхты хор ӆэщатсаман.
Вантопса порайн, ма пиӆэман утаӆтыты рущ пиӆӆам ханты сох ӆуматсат, эвет картэң сэван сэвсаӆӆув. Ӆухасӆам хорам сохӆув умащӆыман, сценайн хорасаңа карыман шушиӆысат. Ма як яксам па антем пиӆан ханты ар арысман», — вантопса манам вераӆ эӆты Румия потартас.
Хоттэӆ хоятат тамиты яха пиӆтащман, вещкат уӆапсаеӆ еӆӆы туӆэӆ. Анти-ащи нётты порайн, няврэм ӆыпеӆ аматан ёхатӆа, ям верат верман, уӆты юшеӆ хуват еӆ шушмаӆат.
Зоя Куртямова ханшам потар
Авторы
Лух Авт
Темы