Лух Авт
Ма нюки хотн сэма питсам
Щиты ястас Матрёна Ивановна Ким (Попова) — Поӆнават куртаӊ ими. Там таӆ ӆув Ас потты тыӆащ 16-метан 81 таӆа йис. Ма ӆув пиӆэӆн Поӆнават куртан уйтантыйсам, мойӊа яӊхсам.
Шай йинщман ӆув уӆапсайӆ эӆты потартас:
– Ащем Иван Абрамович Попов — Касум куртаӊ саран ху, антем Марфа Егоровна (эви опращ нэмаӆ Артеева ус), ӆув Коми АССР мув эӆты ус. Ӆын Касум совхозн вуӆы тащ ӆаваӆсаӊан. Муӊ семьяевн 13 няврэм ус, ма — 12-мет, ин туп ма па мет ай апщем Георгий хащсамн, ӆув Ярославль вошн уӆ. Муӊ хоӆыена касаӆман сэма питсув. Ёӆн туп саран щирн потартсув.
Ун яйӆам па опиӆам ашкуӆайн утаӆтысат, щишн манэм рущ щирн потарты утаӆтасэӆ. Ма 9 таӆа ювмемн туп ашкуӆая масайм. Щит 1952-мет таӆ ус. Оӆаӊмет утаӆтам нэӊем Фаина Лаврентьевна Кауртаева яма нумӆэм. Ӆув нявлак сампи имия ус. Муӊ саран мир, Касумн интерната уӆты-хоӆты ант вусаюв, щишн антем-ащем Касума касаӆсаӊан, куртан нюки хот омассаӊан. Нюки хотн усув, щиты ашкуӆая яӊхсув. Щаӆта ащем Касум колхоз эӆты йира манас, па муӊ вуӆы ухӆатн Поӆнават курта касаӆсув. Щит ун кер тыӆащ 1954-мет таӆ ус. Ма шеӊк ищкийн потсайм, хув лекщитсайм. Ащем кат щёрас соӆкува союмная ох вус, хот па мис ӆутас.
Матрёна Ивановна ясӊаӆ щирн, щи порайн ашкуӆа куща Иван Федотович Пермяков ус, ӆув имеӆ Августа Фёдоровна няврэмат рущ ясӊа па литературая утаӆтас. Щи порайн няврэмат ашкуӆа кур аӆты ураӊан ун ёх хоятата тут юх сэварты нётсат. Нови тут антом ус, щишн класс хоща и керосин лампа ус, контрольной рупатайт ханшсат ки, кат-хуӆам керосин лампайн мийӆысайт. Щаӆта нови тут тыйс, туп иӆ оӆты унты нови тут маты станция рупитас.
1962-мет таӆн Матрёна Попова яӊ класс етшаптас. Еӆӆы Омск вошн утаӆтыты нумасас, туп еӆӆы Топоӆ воша манас, ванты, щий ӆуӊан тутаӊ хоп яӊхас, таӆн — ай тохӆаӊ хоп. Тата пединститут хоща яма экзаменат мас па няврэмат математикая утаӆтаты вер оша верты питас. «Ма яма утаӆтысам, щишн 22 соӆкува 50 копейка стипендия ох ёша вусам. Ванты, муӊ семьяев ар няврэмаӊ ус, антем чумработницая рупитас, щи рупата ураӊан нэмоӆты ох ант сохаптаса. Щаӆта Поӆнават куртан аӆ рупатайт верас, шеӊк ай тыӆащ ох тайс. Ащем щи порайн щутщас — туп 19 соӆкува пенсия ох ёша вус. 1972-мет таӆн ащем антома йис, антема ӆув урӊеӆан 19 соӆкува юкана туп 11 соӆкува маса. Щиты щи ӆаварта усув», — Матрёна Ивановна нумаӆмасӆы.
Пединститутн утаӆтымаӆн айӆат Матрёна икеӊа йис. Икеӆ Олег Иванович Ким ищи щи институтн няврэмат физикая утаӆтаты вера рупитас. Ӆыв семьяеӆн Павел пох сэма питас. Еӆӆы нэпекаӊ катӊан Ёмвош район Луговой курта рупитты китсайӊан, туп Поӆнават курт ашкуӆая математика па физика урокӊан туты хоят антом ус, щишн ӆыв айӆат семьяеӆ Матрёна рут куртэӆа ёхтас. Щит 1967-мет таӆ ус. Ашкуӆа куща ху Иван Федотович Пермяков шеӊк амтас, хоты ӆув утаӆтам эвеӆ нэпекаӊа йис па ёхӆы рут ашкуӆаеӆа рупитты керӆас.
Матрёна Ивановна потартас, Поӆнават куртан мет оӆаӊан няврэмат Турам хот хоща утаӆтысат. Щаӆта советской лащ порайн ашкуӆа хот омасса. Ӆув потартаӆ: «Уйтӆэм, 1938-мет таӆн тый ар мир нартамӆы китса, щишн яӆап ашкуӆа хот омасса. 400-кем няврэм кат сменайн, етн ун ёх утаӆтысат. Ма ашкуӆаевн куща ӆаӊкар нэӊа уӆмемн нумӆэм, хоты 450 няврэм утаӆтысат, щит эӆты 150 шоши мир эви-пох интернатн усат. Ашкуӆа хотэв ай ус, щишн итухӆ ишн па хотатн, интернатн муй па экспедиция эӆты хащам сохат пусты хотн утаӆтаты верат ӆэщатсув. Иван Федотович Пермяков яӆап ашкуӆа омасты ураӊан ун кущаята пищмайт ханшиӆыйс, иса муй верас, ӆуӆн сорашак ат омасса. 1977-мет таӆн яӆап ашкуӆа пуншса, туп ӆув щи еӆпийн антома йис».
Щиты Матрёна Ивановна Ким 36 таӆ Поӆнават куртаӊ няврэмат математикая утаӆтас, куща ӆаӊкар нэӊа ус. Щи мосты рупата тувмаӆн ар ишакты нэпек тайӆ. 2002-мет таӆ вуш эӆты щутщаӆ. «Щутщатэмн хот рупата верӆам, ӆуӊ порайн арсыр овощат, аня лыптат энмаӆӆам. Икем па Павел ун похем антома йисӊан. Там Поӆнават куртан Александр кимет похем уӆ, ӆув ван кутн мояӊа ёхтыӆыйӆ. Хуӆам хиӆы тайӆам, ӆыв уна йисат», — ёхи хащам артан Матрёна Ивановна ястас.
Людмила Шульгина ханшам потар
Авторы
Лух Авт
Темы