Лух Авт
Ма ӆуңан утаӆтаты нэңа рупитсам
Овкурт ашкуӆайн там пуш ихощъяңмет класса ӆапат няврэм туп манаӆ. Щи няврэмат кутан Ирина Лонгортова. Каникулы порайн муй верас па хоты щутщас, щит эӆты ӆувеӆ инщассэм.
«Ӆуңан, ма вутщисам еша рупитты па утаӆтыты еӆпийн щутщаты. Хун рупата ураңан ашкуӆая ханшӆтантыты мантсам, ма инщассайм, там пуш Кева манӆам, муй антом? Ай тэӆан вуӆы хотан энамман ма шеңк ӆаңхасайм Кева манты. Щи порайн ай няврэмат утаӆтаты нэ манэм ястас: «Хота манӆан па щита ӆуң сыс ай няврэмат утаӆтаты нэңа рупитты питӆан?» Ма нох аматман, мохты щи кашащсам.
Па няврэмат пиӆан муң вертолётан Кева тусаюв. Ма яртъяңмет бригадайн Эдуард яйем хоща хащсам. Утаӆтаты нэңан мийм нэпекат, книгайт патан тусӆам па хотан уӆты ай няврэмата ёнтты кашн урокат маты питсам. Ям хатӆат порайн муң каман шушиӆысув. Ма ӆувиӆаӆа альсам па потартсам лыптат, толхат, вонщам отат муй хорпи нэмат тайӆат, муя щимащ нэман понтсайт.
Физкультура юкана касман хухатӆысув па паӆ кеват ӆоңӆа нох хуңхиӆысув. Ертаң хатӆатан хот ӆыпийн омасман книгайт ӆуңатсув, нэпекан моӆты ханшсув па хорат щуратсув. Щи тумпийн, эвет утаӆтасӆам хорамаңа охсох сэвты, акань верты, щашкан ёнтты. Ёӆан верты рупата па уӆ: йиңк аӆты, варс юх акатты, ан лёхитты па шай кавартты. Хой муй верытаӆ, щит вераӆ. Нэмоӆты хоят рупатайӆы ант шушиӆыйӆ па антиӆаӆа, ащиӆаӆа ищи нётапса. Ма там ӆуңан шеңк яма щутщасам. Ай няврэмат пиӆан ищи ощхуль па каш ус ёнтман утаӆтыты. Овкурта ёхатмем юпийн отчёт нэпекӆам ӆэщатсаӆӆам па утаӆтаты нэңема масӆам», — щиты Ирина ястас.
Муң па ашкуӆайн утаӆтыты няврэмата мойӆапса ясаң китӆув. Яма утаӆтыяты, ӆуңтаты, яӆап щират оша пайтаты. Ашкуӆайн утаӆтыты таӆат сора етшаӆат.
Зоя Куртямова ханшам потар
Авторы
Лух Авт
Темы