обновлено: 09:26, 15 сентября 2026
Лух Авт
Максароват хуӆ веӆты ёх
Ӆорвош рыбоучастка ям араткем хуӆ веӆпасӆаты таха ӆуӊтасаӆ. Панзи пан па тохи ӆоӊаӆман уӆ. Тампуш сита ӆапат хоттэӆ рупитаӆ. Ӆув кутэӆан Максароват ёх хуӆам хоттэӆ. Там лопасан потрэм Геннадий Михайлович па Юлия Егоровна Максаровӊан эӆты туӆэм.
Хоттэӆ хоятӆаӆ
Геннадий Михайлович асеӆ-аӊкеӆ шуӊат Ӆорвошан усӊан. Уӆман сыс хуӆ веӆпасӆысӊан. Хоттэӆ хоятӆаӆ эӆты ситы ястас: «Ун асем Егор Макарович, Воӆаӊ Ляль ураӊан хуӆ веӆман рупитас. Хуӆам няврэм тайс. Йи похаӆ, ма асем — Михаил Егорович Максаров.
Асем йи яйӆ — Дмитрий Егорович, уятты хуӆ веӆты хоята ус. Кимет апсеӆ — Владимир Егорович, там хатӆ унты вуӆы тасян яӊхаӆ. Ешауӆ ӆапатъяӊ таӆа йиӆ, хоӆна рупитаӆ. Куртан уӆты ант ӆаӊхаӆа, ёӆан омасты ант верытаӆ. Няврэмӆаӆа нётаӆ: вуӆыӆаӆ акатман яӊхаӆ, лохан хухатӆыйӆ».
Уӆапсайӆ
Ханты хоятэв ай пора эӆты асеӆа хуӆ мосятты нётас. Муй пора эӆты рупитты питас па каматса ясаӊ верас: «Семьяеван ар няврэм энмас. Ма туп йи пох па хуӆам эви хасьсув. Ашкуӆа етшамем юпийн, армияя вусайм. 1990-1992-мет таӆатан Нижний Новгород вошан служитсам. Йи шуп СССР хося, йи шуп Россияйн. Армия эӆты ёхатмем юпийн, мохты хуӆ веӆты питсам. Оӆӊа утся рупитсам. Си порайн бударкайн хуӆ веӆпасӆаты яӊхсув. Няӆ кукла арат хуватаӆан хоӆап утся эсӆыты верытсам.
Хольмаӊ моӆтас таӆ хуӆ мосятман рупитӆам. Ӆуӊан — Панзийн, сусан па Ӆар ёхана манӆув. Си еӆпийн, сус порайн Хаш пухра касӆысув. Ин па Ӆар ёханан сойпиман уӆӆув. Хун ёханэв потты питӆа, каматса таха ермаӆӆув па пунат омасӆув. Сорт мосятман уӆӆув. Катра пора эӆты ун асем, асем сита хуӆ веӆман усӊан. Ин па няврэмӆаӆ па хиӆыӆаӆ. Ма йирэм пиӆан рупитӆам, ийимем па нётаӆ. Кимет хопан па ӆэхуем. Порайн няврэмӆам ёхтыӆыӆат».
Пиӆ хоятаӆа нётаӆ
Ӆуӊ порайн, Юлия Егоровна икеӆа нётаӆ, яха хоӆап вантты яӊхӆаӊан. Ӆув па каматса ясаӊ рутӆаӆ, рупатайӆ, там пора уӆапсайӆ эӆты потартас: «Ма Щаня муван Ямкуртан энампсам. Эви опрась нэмем Пырысева. Асиӆам-аӊкиӆам сита усӊан, тасян яӊхсаӊан. Асем шуӊат — Егор Алексеевич Пырысев, аӊкем — Татьяна Петровна Пырысева (Озелова), Васьёханов ӆар рут эӆты. Асем передовика ус. Хут яй па йи нэ апси — Дарья Алексеевна Нензелова (Пырысева) тайс.
Муӊ семьяеван яӊ няврэм энмас. Ма мет ай. Кат яем па йи опем тащ хотан вуӆы тащан яӊхсаӊан. Опиӆам хоӆ рупитты сира утаӆтысат, районэван рупитӆат.
Ма Ёмвошан ай няврэмат шавиты па ай няврэмат рут ясӊа утаӆтаты нэӊа утаӆтысам. 1991-мет таӆан педагогической колледжан оӆаӊ ай няврэмат рут ясӊа утаӆтаты отделение пуншса. Хун утаӆтыты етшасам, направление хуват Питӆор курта китсайм. Сита ай няврэмиет хатӆ сыс яӊхты хотан воспитателя рупитсам. Питӆор куртан икем пиӆан уйтантысам. Си юпийн Ӆорвоша касаӆсаман.
Си пора эӆты тата уӆӆаман. Ешауӆ хольмаӊ таӆа йиӆ, хоты яха мантсаман. Хуӆам няврэм энмаӆсаман. Хоӆ высшой образование тайӆат, рупитӆат. Таӆ сыс садикан рупитӆам. Ӆуӊан па, хун сютсяты манӆам, пиӆ хоятэма хуӆ веӆты нётӆам. Панзийн уӆӆаман. Хун ун эвеман сэма питас, ийикем асеӆан па яйӆаӆан хотан омассайман. Си пора эӆты тохи яӊхӆаман. Кашӊ ӆуӊ сита уӆӆув, няврэмӆув сита энампсат. Похем ай уӆмаӆ порайн, хут таӆ кеман, бударкая опсыӆыйс, сэвс тайс. Похат си вер шеӊк самаӊа тайӆэӆ. Ин уна йисат, асеӆа нётӆат.
Панзийн хуӆ веӆпасӆаты тумпийн, унтан вонсямот вонсьӆув. Ӆуӊ сыс иса сита. Няврэмӆув ёхтыӆыӆат, сютсиӆат. Тампуш хуӆ шимаӆ, йиӊкаӆ ай. Хатӆ сыс ветъяӊ, хутъяӊкем киӆа мийӆысув. Туняӆ аршак ус».
Геннадий Михайлович па Юлия Егоровна, еӆӆы пеӆа тумтака уӆаты, хоӆапӆын ар хуӆан ат хойӆайт. Тумтак ёш, тумтак кур!
Альбина Тырлина ханшам потар
